Мыекъопэ «Зэкъошныгъэм» иешIэкIо анахь дэгъухэм ащыщыгъэу Анатолий Абрамовым ишIэжь фэгъэхьыгъэ зэнэкъокъур аухыгъ.
Мыщ кIэщакIо фэхъугъэхэ АР-м футболымкIэ и Федерациерэ Адыгеим физическэ культурэмкIэ ыкIи спортымкIэ и Комитетрэ жъоныгъуакIэм и 31-м командэхэм, мы спорт лъэпкъыр зыгу рихьыхэрэм мэфэкI Iофтхьабзэ афызэхащагъ. Апэрэу «Абрамовым и Кубок» зыфиIорэ турнирым къыдыхэлъытагъэу ящэнэрэ чIыпIэм икъыдэхын фэгъэхьыгъэ ешIэгъу рагъэкIокIыгъ. Командэ анахь лъэшиплIыр ары хагъэунэфыкIырэ чIыпIэхэм афэбэнагъэхэр.«Легионымрэ» «Ансарымрэ» ящэнэрэ чIыпIэм фэбэнагъэх. Мы ешIэгъур узIэпищэу зэрэкIуагъэр пстэуми нэрылъэгъу афэхъугъ. Я 47-рэ такъикъым нэс «Легионыр» хэпшIыкIэу нахь лъэшыгъ. Командэм икапитанэу Бжьэц Бислъанрэ ГуIэтыжь Рустамрэ къэлапчъэм Iэгуаоу дадзагъэхэм яшIуагъэкIэ пчъагъэр 3:0 хъугъэ. Мыщ дэжьым зэIукIэгъур зыхьыщтыр къэнэфэгъахэу бэмэ къащыхъугъ. Ау «Ансарыр» къызэкIэкIуагъэп, мыщ икапитанэу Щыгъущэ Амиррэ Цурмыт Сауррэ къэлапчъэм Iэгоо зырыз дадзагъ, пчъагъэр 2:3 хъугъэ. ЕшIэгъум иохътэ шъхьаIэ хагъэхъуагъэм «Ансарым» пенальти къылэжьыгъ, Щыгъущэ Амир къэлапчъэм дэуагъ ыкIи пчъагъэр 3:3 ышIыгъ.Шъугу къэдгъэкIыжьын, командэхэр такъикъ 25-рэ зырыз зэрылъ таймитIу мэджэгух. Пчъагъэр зэфэдиз зыхъукIэ, текIоныгъэр къыдэзыхыщтыр пенальтикIэ къэнафэ. Мыщ «Ансар» ифутболистхэм нахь дэгъоу зыкъыщагъэлъэгъуагъ, ахэм джэрз медальхэр афагъэшъошагъэх.Финалым щызэIукIагъэх «Ошъутенэмрэ» «Кавказымрэ». Командэхэм къэлапчъэм Iэгуаор дадзэн алъэкIыгъэп, пчъагъэр 0:0-у охътэ шъхьаIэр аухыгъ. Ащ къыхэкIыкIэ чемпион хъущтыр пенальтикIэ къэнэфагъ. Мыщ дэжьым «Кавказым» икъэлэпчъэIутэу Сергей Черновым дэгъу дэдэу зыкъыгъэлъэгъуагъ, ащ гъогогъуитIо Iэгуаор къызэкIидзэн ылъэкIыгъ. «Кавказым» текIоныгъэр къыдихыгъ, «Абрамовым и Кубок» къыфагъэшъошагъ.Турнирым иешIэкIо анахь дэгъухэр зэхэщакIохэм къыхагъэщыгъэх. Ахэр зыщешIэхэрэ чIыпIэм елъытыгъэу: Сергей Черновыр («Кавказ»), Иван Чугуевыр («Ошъутен»), Тамерлан Приваловыр («Ансар»), Арсен Мазловыр («Ошъутен»), Бжьэц Бислъан («Легион»), Датхъужъ Адам («Кавказ»).