ДзюдомкIэ Къыблэ федеральнэ шъолъырым ичемпионат мэфищым къыкIоцI Мыекъуапэ щыкIуагъ.
Адыгэ къэралыгъо университетым физическэ культурэмкIэ ыкIи дзюдомкIэ и Институт испорт зал щыкIогъэ зэнэкъокъухэм хъулъфыгъэхэмрэ бзылъфыгъэхэмрэ ахэлэжьагъэх. Ахэр шъолъырибгъумэ къарыкIыгъэх, зэкIэмкIи нэбгырэ 255-рэ хъущтыгъэх.Мы еджапIэм идэпкъхэм олимпийскэ чемпион пчъагъэ къашIэжьы, ахэм тикъэралыгъо ищытхъу дунаим щагъэIугъ. Джы Урысыем и Къыблэ идзюдоист анахь лъэшхэр мыщ щызэрэугъоигъэх. Урысыем ичемпионат икIэух едзыгъо хэлэжьэщтхэр зэнэкъокъум къыщынэфагъэх.
Краснодар краим, Ростовскэ, Астраханскэ ыкIи Волгоградскэ хэкухэм, Адыгеим, Къырым, Донецкэ ыкIи Луганскэ народнэ республикэхэм, Севастополь ялIыкIохэр зэнэкъокъугъэх. Адыгэ Республикэр хъулъфыгъэ 31-мэ ыкIи бзылъфыгъи 3-мэ къагъэлъэгъуагъ. Ахэм ащыщэу нэбгырихмэ джэрз медальхэр къахьыгъэх. Ахэр: Бэслъэнэй Темирлан, Владимир Ингушевыр, Бэгъ Аслъан, Датхъужъ Алый, Бэгъ Салим ыкIи Камилла Дзагаловар.Спортсменхэр зыгъэхьазырыгъэхэр Мудрэнэ Аслъанрэ КIубэ Хьамедрэ.Краснодар краим испортсменхэм дэгъу дэдэу зыкъагъэлъэгъуагъ. Ахэм дышъэ медаль 13 ыкIи тыжьынэу 14 къахьыгъ. Зы зэIукIэгъум нэмыкIэу, адрэ финалхэм зэкIэми краим илIыкIо ахэтыгъ. Мы шъолъырым щымыщэу текIоныгъэ къыдэзыхын зылъэкIыгъэ закъор Волгоградскэ хэкур къэзыгъэлъэгъогъэ Дарья Антоновар ары.Урысыем ичемпионат къыкIэлъыкIорэ иедзыгъо Ставропольскэ краим икъалэу Менеральные Воды чъэпыогъум щыкIощт.