Хэгъэгум иухъумакIохэр
«ТекIоныгъэр къыдэзыхыгъэхэм ялIэужхэр» зыфиIорэ медиапроектыр къэралыгъо фондэу «Хэгъэгум иухъумакIохэр» зыфиIорэм мыгъэ ящэнэрэу пхырещы.
— ТекIоныгъэм и Мафэ анахь агъэлъэпIэрэ мэфэкI. ТицIыфхэм языкIыныгъэ ыкIи язэкъотныгъэ мы мафэм нахь зэхэтэшIэ. ЛIыхъужъныгъэ зэрахьэзэ, ти Хэгъэгу къэзыухъумагъэхэм ыкIи тылым Iутыгъэхэм шъхьащэ афэтэшIы, ящытхъу тэIо. Непэ тиухъумакIохэм — хэушъхьафыкIыгъэ дзэ операцием хэлажьэхэрэм — а пшъэрылъыр агъэцакIэ. Фашизмэм тыщызыухъумэгъэ лIыхъужъхэм тызэрялIэужыр къыдгурыIозэ тызэкъотэу ыкIи тырыгушхоу ТекIоныгъэшхом ибыракъ зетхьан фае, — хигъэунэфыкIыгъ УФ-м зыкъэухъумэжьынымкIэ иминистрэ игуадзэу, фондэу «Хэгъэгум иухъумакIохэр» зыфиIорэм итхьаматэу Анна Цивилевам.
Шъолъыр фондым ипащэу ПIатIыкъо Аслъан къызэриIуагъэмкIэ, мы Iофтхьабзэр ТекIоныгъэм и Мафэ фэгъэхьыгъ.— Проектыр мыгъэ ящэнэрэу фондым регъэкIокIы. Ащ ипшъэрылъыр Хэгъэгу зэошхом хэлэжьагъэхэм лIыгъэу зэрахьагъэм ишIэжь къызэтегъэнэгъэныр ыкIи непэрэ мафэм илIыхъужъ-хэм ягугъу тшIыныр ары, — къыхигъэщыгъ ПIатIыкъо Аслъан.Унагъо пэпчъ Хэгъэгум къулыкъу зэрэфихьыгъэмкIэ тарихъ шъхьаф пылъ. Евгений Абатуровым мыр ошIэ-дэмышIэу къыхихыгъэп. А лъагъор ежь ыпэкIэ бэшIагъэу яунагъо щыпхырыщыгъэу щытыгъ. Къэралыгъом анахь охътэ хьылъэ къызщекIугъэм ятэжъ ятэ Хэгъэгур къыухъумагъ.Евгений Игорь ыкъор къэралыгъо къулыкъум ищыIэныгъэ фигъэхьыгъ. Хэгъэгу кIоцI Iофхэм-кIэ къулыкъухэм исэнэхьат гъогу щыригъажьи, Урысые гвардием исатырхэм ащылъигъэкIотагъ.ХэушъхьафыкIыгъэ дзэ операцием идзэ пшъэрылъхэр щигъэцакIэхэзэ, Евгений Абатуровыр лагъымэ-къаом ыпкъ къикIыкIэ 2023-рэ илъэсым уIэгъэ хьылъэ къытыращагъ.
Псэемыблэжьэу ыкIи гущыIэ пытэу ытыгъэм зэрэфэшъыпкъагъэм афэшI бгъэхалъхьэхэу «За отвагу», «Участник СВО» ыкIи я III-рэ шъуашэ зиIэ «За отличие в службе» зыфиIохэрэр къыфагъэшъошагъэх. Джы Евгений социальнэ координаторэу шъолъыр фондым Iоф щешIэ.КIэлэ ныбжьыкIэм щысэшIу фэхъугъэхэр ятэжъ пIашъэхэр ары. Ятэ ылъэныкъокIэ Василий Абатуровыр Хэгъэгу зэошхом илъэхъан лъэсыдзэ разведкэм иотделение икомандирыгъ. Гъунапкъэм Iутэу заор къежьагъ. Апэрэ мафэхэм къащегъэжьагъэу зэо операциехэм лIыгъэ ащызэрихьагъ, разведкэ пшъэрылъхэм язэшIохын ахэтыгъ. Игъэхъагъэхэм афэшI Жъогъо Плъыжьым иорден къыфагъэшъошагъ.Янэ ылъэныкъокIэ ятэжъ ятэу Михаил Мишиным Европэр шъхьафит ашIыжь зэхъум зэпэуцужь пхъашэу щыIагъэхэм лIыгъэ ащызэрихьагъ. Я III-рэ шъуашэ зиIэ Щытхъум иорден къыратыгъ.Проектэу «ТекIоныгъэр къыдэзыхыгъэхэм ялIэужхэр» зыфиIорэм хэлажьэх Христенкэхэу Александррэ ащ ыкъоу Русланрэ. Родниковскэ аэродромым дзэкъулыкъушIэу илъэс пчъагъэрэ Александр щыIагъ. 2022-рэ илъэсым хэушъхьафыкIыгъэ дзэ операциер къызежьэм, апэу дащыгъэхэм ахэтыгъ. Ащ къыщауIагъ, ипсауныгъэ изытет къыхэкIэу майорыр тIысыжьын фае хъугъэ. Джы Руслан ятэ илъагъо тетэу аэродромым дзэ пшъэрылъхэр щегъэцакIэх, къухьэлъатэхэр дэбыбыенхэм фегъэхьазырых.— Сятэ дзэ операцием къулыкъур щихьызэ гъэпсэфыгъом къызэкIом, колледжым сычIэсыгъ. Джащ дэжьым дзэкъулыкъушIэ сызэрэхъущтыр ащ есIогъагъ: «Сыда о ащ фэдэ узыхъугъэкIэ, сэ сызкIэмыхъущтыр?». СыныбжьыкIэ къыстефэрэ къулыкъум сызащэм, УФ-м зыкъэухъумэжьынымкIэ и Министерствэ зэзэгъыныгъэ дэсшIыгъ ыкIи аэродромым сагъэкIуагъ. 2024-рэ илъэсым къыщегъэжьагъэу 2025-м нэс танкхэм апэшIуекIорэ подразделением сыхэтэу Белгород къэсыухъумагъ. Джыри сырящыкIагъэу залъытэкIэ, зыфаIорэ чIыпIэм сыкIоным сыфэхьазыр, — къыхигъэщыгъ Руслан Христенкэм.Александр къызэриIуагъэмкIэ, унагъом щысэшIу фэхъугъэр ятэжъ пIашъэу Михаил Христенкэр ары.— Курскэ дугам щыкIогъэ зэпэуцужьым ар хэлэжьагъ, уIэгъэ хьылъэу къытыращагъэм къыхэкIэу ар къагъэкIожьыгъагъ, ылъакъохэр лагъымэм пиутыгъагъэх. СыцIыкIоу къэсэшIэжьы, ащ дэжьым курэжъыехэр щыIагъэхэп, пхъэм хэшIыкIыгъэ пкъыгъом тесэу къызэрекIокIыщтыгъэр. Джащ фэдэу сишъхьэгъусэ ятэжъ ятэу Михаил Данькиныр Москва икъэухъумэн хэлэжьагъ, Берлин нэсыгъэхэм ахэтыгъ. Псаоу къэкIожьыгъ, илъэсыбэ къыгъэшIэжьыгъ. Тын лъапIэхэр тIуми яIагъэх. Ахэм ялъагъо ятэрэ ыкъорэ тырэкIо, — хигъэунэфыкIыгъ Александр.ЛIэужхэр, заохэр, лIэшIэгъухэр зэфэшъхьафых. Ау сыд фэдэрэ лъэхъани ахэр зэзыпхыхэ-рэр къэралыгъор къаухъумэным зэрэфэхьазырхэр ары.Iэшъынэ Сусан.