Гизатуллинхэм яунагъо ихъарзынэщ
Советскэ Союзым и ЛIыхъужъхэм ядышъэ жъогъобын чIыпIэ хэхыгъэ щеубыты Хамазан Гизатуллиным. Ар къызыхъугъэр илъэси 105-рэ мэхъу.
Ар Курганинскэ хэкумкIэ Шадринскэ районым ит псэупIэу Сибиркэ жъоныгъуакIэм и 10-м, 1921-рэ илъэсым къыщыхъугъ. Класси 7-р къызеухым, колхозым щылэжьагъ. 1940-рэ илъэсым Дзэ Плъыжьым ащагъ ыкIи КъокIыпIэ Чыжьэм изы гъунэпкъэ отрядхэм ахэтыгъ. 1942-рэ илъэсым, командир нахьыкIэхэм яеджапIэу Владивосток дэтыр къыухи, Забайкальскэ дивизием ия 106-рэ щэрыокIо дивизие наводчикэу агъэкIогъагъ. 1943-рэ илъэсым икъихьагъум Курскэ дугам ирайон къэсыгъ, гъэмафэм икъихьагъум ащ зэошхом зыкъыщиштагъ. Забайкальскэ дивизием хэтэу старшэ сержантэу, «сорокопяткэм» икомандирэу Гизатуллиныр заощтыгъ, я 27-рэ щэрыокIо корпусым ыкIочIэ шъхьаIэ щыщыгъ. Чъэпыогъум икъихьагъум, 1943-рэ илъэсым я 106-рэ дивизиер Белоруссием и Гомельскэ хэку ит поселкэу Лоев дэжь икъыблаIоу псыхъоу Днепрэ Iухьагъ.
Командованием зэрэрихъухьагъэу, апэчIынэтIэ псынэпкъым десантэу капитанэу Г. Д. Гардополовыр зипащэр къыщытIысынэу щытыгъ. Пшъэрылъэу яIагъэр мы чIыпIэр аштэныр ыкIи полкым ыкIочIэ шъхьаIэхэр псыхъом зэпырыдзыгъэнхэр арыгъэ. Ар зэшIуахын фэягъ старшэ сержантхэу Х. Гизатуллиным, А. Немчиновым, взводым истаршинау А. Козорезовым ыкIи алъэкI къызэрихьэу десантым пыим зао ришIылIэнэу щытыгъ. Мэфэ зытIущым, Гизатуллиным ыкIи Немчиновым ягукъэкIкIэ, пхъэ зэхэIулIэгъэ зэпырыкIыпIэхэр ашIыгъэх, ахэмкIэ псым зэпырыдзыгъэнхэ фэягъ пушкэр, къэмлан пшIы пчъагъэу щэхэр зыдэлъхэр. Чъэпыогъум и 15-м ичэщ пытапIэр аубытын фэягъ. Пчэдыжь нэфмышъым кIым-сымыр «катюшэхэм» яомакъэ ыукъуагъ, артиллерием зэо машIор ыублагъ ыкIи псыхъом зэпырыкIынхэр рагъэжьагъ. Псы гузэгум нэсыгъэхэу гу къалъатагъ, пыим иартиллерие къяоу ригъэжьагъ. МэшIо зэхаом хэтэу Х. Гизатуллиным, теубытагъэ хэлъэу зекIозэ, ипшъэрылъ ыгъэцэкIагъ — тиехэр адрэ нэпкъым екIугъэх, чIыпIэ гъэнэфагъэ аубыти, пыим текIуатэхэу фежьагъэх. Мы чIыпIэм зэошхом зыкъыщиIэтыгъ, тидзэхэр зэдеIэжьхэзэ, пыим жэхэкIотагъэх.Нэфшъагъом тидзэу атекIуатэхэрэм ашъхьагъ фашист авиациер къытебыбагъ. Пыир хьашхъурэIоу къатекIуатэу къязаощтыгъ. Джащ фэдэ зэо зэIупхъогъум, чъэпыогъум и 22-м, Хамазан Гизатуллиныр хьылъэу къауIагъ ыкIи госпиталым чIэфагъ. Чъэпыогъум и 30-м, 1943-рэ илъэсым, дзэкIолI IэпэIэсэныгъэу, лIыгъэу, псэемыблэжьныгъэу зэрахьагъэм апае Х. Гизатуллиным, наводчикэу С. Кузнецовым цIэ лъапIэу «Советскэ Союзым и ЛIыхъужъ» зыфиIорэр къафагъэшъошагъ. Апшъэрэ къэралыгъо шIухьафтын лъапIэр къаратыгъ А. Козорезовым ыкIи А. Немчиновым.Госпиталым къызычIэкIыжьым, Х. Гизатуллиныр младшэ лейтенант курсхэм ащеджагъ ыкIи къызеухым, щэрыокIо взводым ия 118-рэ дзэ отряд икомандирэу агъэнэфагъ, «Багратион» зыфиIорэ Белорусскэ операцием хэлэжьагъ.
Щылэ мазэм, 1945-рэ илъэсым къыщегъэжьагъэу Х. Гизатуллиныр я 130-рэ гвардейскэ щэрыокIо полкым ивзвод икомандирэу зэуагъэ, зэо лъэшхэу Польшэм ыкIи Германием ащыкIуагъэхэм ахэтыгъ. Ахэм лIыхъужъныгъэу къащигъэлъэгъуагъэм, Данциг шъхьафит зэрашIыжьыгъэм апае, Александр Невскэм иорден къыфагъэшъошагъ. Джащ фэдэу Деммин, Штеттин, Рибниц, нэмыкIхэри шъхьафит зышIыжьыгъэхэм Гизатуллиныр ахэтыгъ.Мэкъуогъум и 24-м, 1945-рэ илъэсым я 2-рэ Белорусскэ фронтым иполк хэтэу ТекIоныгъэм ипарадэу Москва щыкIуагъэм хэлэжьагъ.1953-рэ илъэсым Х. Гизатуллиным команднэ купыр гъэкIэжьыгъэнымкIэ курсхэр къыухыгъэх. 1959-рэ илъэсым щегъэжьагъэу Мыекъопэ дзэ гарнизоным ищэрыокIо батальон икомандир игодзагъ, илъэс тешIагъэу ащ къыхэкIыжьи, зигъэпсэфынэу тIысыжьыгъэ.Илъэсыбэрэ мебелышI объединениеу «Зэкъошныгъэм» слесарэу щылэжьагъ. Заом иветеран сыдигъуи общественнэ Iофышхо ышIагъ, ныбжьыкIэхэм япатриотическэ пIуныгъэ иIахь ин хилъхьагъ.Ветеранэу Х. Гизатуллиныр Адыгеим иеджэпIэ зэфэшъхьафхэм Лъэпкъ музеим щызэхащэрэ Iофтхьабзэхэм арагъэблагъэщтыгъ, игуапэу ахэлажьэщтыгъ. АР-м и Президент дэжь щызэхащэгъэ нахьыжъхэм я Совет хэтыгъ, емызэщыжь IофышIэшхуагъ.АР-м и ЛIышъхьэ и УнашъокIэ Хамазан Гизатуллиным республикэм итын анахь лъапIэу медалэу «Адыгеим и Щытхъузехь» зыфиIорэр къыфагъэшъошагъ.Ау зэо уIагъэхэм къыфырагъашIэ хъугъэ, илъэс 87-м итэу шэкIогъум и 19-м, 2007-рэ илъэсым зэлъашIэрэ артиллеристыгъэу, лIыхъужъ шъыпкъагъэу Х. Гизатуллиным идунай ыухыгъ. Ащ ищыIэныгъэ Хэгъэгур уилъэпIэным, уухъумэным ящыс. ЛIыхъужъым ыцIэ ныбжьырэу Хэгъэгум итарихъ къыхэнагъ.ЗыгъэхьазырыгъэрМамырыкъо Нуриет.