Лъэпшъыкъо Ф.
Адыгэ сурэтышI цIэрыIоу ПIэтIыощэ Феликс ишIэжь фэгъэхьыгъэ къэгъэлъэгъон КъокIыпIэ музеим и Темыр-Кавказ къутамэ къыщызэIуахыгъ. СурэтышIым ыпхъоу ПIэтIыощэ Фатимэ, Лъэпкъ музеим, КъокIыпIэ музеим и Темыр-Кавказ къутамэ ыкIи АР-м и Сурэт къэгъэлъэгъуапIэ яхъарзынэщхэм къахэхыгъэ IофшIэгъэ 70-м ехъу ащ хэхьагъ.
Адыгэ сурэтышIым иIофшIэгъэ хьалэмэтхэр урысые ыкIи дунэе культурэхэм язы Iахь хъугъэх. ПIэтIыощэ Феликс итворчествэкIэ гъэхъагъэу ышIыгъэхэм апае щытхъуцIабэ ыкIи шIухьафтын зэфэшъхьафхэр къылэжьыгъэх. Ар Урысыем изаслуженнэ сурэтышI, Адыгеим илъэпкъ сурэтышI, АР-м и Къэралыгъо шIухьафтын, художествэхэмкIэ Урысые академием идышъэ медаль къыфагъэшъошагъэх.Iофтхьабзэм хэхьэгъэ IофшIэнхэм живописыр, графикэр ащыгъэфедагъ. Адыгэ жэрыIо творчествэмрэ нарт эпосымрэ къахэхыгъэ лъэныкъо зэфэшъхьафхэм япхыгъэ паннохэр ыкIи коллажхэр къэгъэлъэгъоным хэхьагъэх. Тыкъэзыуцухьэрэ дунаим идэхагъэ сурэтыбэмэ къыраIотыкIы. СурэтышIым иIофшIагъэхэр гъэшIэгъонэу гъэпсыгъэх, гупшысэ куу ащыпхырыщыгъ.Музеим ипащэу ШъэуапцIэкъо Аминэт, АР-м исурэтышIхэм я Союз итхьаматэу Елена Абакумовар зэхахьэм къыщыгущыIагъэх.— ПIэтIыощэ Феликс Адыгеим исурэтышI IэпэIасэу щытыгъ. Ащ ицIыфыгъэ бэрэ укъытегущыIэн плъэкIыщт. Сыд фэдэ лъэныкъо зыфигъэзагъэми, анахь шъошэ лъагэм илъэу ыгъэцэкIагъ. Лъэпкъ гупшысэр иIэшIагъэмэ ащыпхырыщыгъ. IэпэIасэм итворчествэ зэрэиныр, зэрэзэтефыгъэр иIэшIагъэмэ къащигъэлъэгъуагъ, — къыIуагъ АР-м культурэмкIэ иминистрэу Аулъэ Юрэ.— ПIэтIыощэ Феликс зэрэадыгэр ымыгъэгъуащэу искусствэм фэлэжьагъ. Ар непэ къытхэмытыжьми, иIэшIагъэхэр къытфэнагъэх. «Сидящие в терновнике» зыфиIорэ IофшIагъэр икъоджэ гупсэу Пэнэхэс фигъэшъошагъ. Джащ фэдэу нартмэ афэгъэхьыгъэ сурэтхэм лъэпкъым идэхагъэрэ илъэшыгъэрэ къащырегъэлъэгъукIы. ПIэтIыощэ Феликс щыIагъ ыкIи щыIэщт, — къыIуагъ къэгъэлъэгъоным икураторэу Тыгъу Рэмэзан.Iофтхьабзэм Адыгэ Республикэм ишIэныгъэлэжьхэм ащыщхэр, сурэтышIхэр, АР-м культурэмкIэ и Министерствэ илIыкIохэр, искусствэхэмкIэ колледжэу Тхьабысымэ Умарэ ыцIэ зыхьырэм истудентхэр, зекIохэр хэлэжьагъэх. ПIэтIыощэ Феликс итворчествэ зикIэсэ цIыфыбэ Адыгеим зэрисыр къэгъэлъэгъоным джыри зэ къыушыхьатыгъ.ЛъэпшъыкъоФатим.