Зызэхащагъэр илъэс 15 хъугъэ

Урысые Народнэ фронтыр загъэпсыгъэр мы мафэхэм илъэс 15 хъугъэ.

Ащ хэтхэм афэгушIуагъ ­Адыгеим и ЛIышъхьэу, «Единэ Россием» ишъолъыр къутамэ и Секретарэу КъумпIыл Мурат.«Урысыем и Президентэу Владимир Путиныр икIэщакIоу агъэпсыгъэ движением шIуагъэ зэриIэр къыгъэшъыпкъэжьыгъ ыкIи цIыфхэмрэ хабзэмрэ зэзыпхыхэрэ лъэмыдж хъугъэ.Народнэ фронтым общест­венностыр зэпстэумэ зэралъыплъэрэ амалэу зыкъыгъэлъэ­гъуагъ. Шъолъыр командэм хэт­хэр тигъусэхэу цIыфхэм ягу­мэкIыгъохэм ядэгъэзыжьын тыдэлажьэ. Ащ ишIуагъэкIэ гъо­гухэм язытет, псэупIэ-коммунальнэ хъызмэтым иIофшIэн, экологиер къызэтегъэнэгъэным, псауныгъэм икъэухъумэн ыкIи гъэсэныгъэм япхыгъэ псэуа­лъэхэр зэраIыгъхэм тынаIэ атедгъэтын тэлъэкIы.ЦIыфхэм ящыIакIэ нахьышIу хъуным, щыIэныгъэм амалэу къытырэ пстэур къызIэкIэгъэхьэ­гъошIу афэхъуным фытегъэпсы­хьагъэу Народнэ фронтыр кIэщакIо зыфэхъухэрэм тэркIэ мэхьанэшхо яI. ОшIэ-дэмышIэ Iоф къызыхъукIэ, ащ къыздихьыгъэ гумэкIыгъохэм ядэгъэзы­жьын мы движением илIыкIохэр апэрэхэм ащыщэу хэлажьэх, Адыгеим щыпсэухэрэм мызэу, мытIоу IэпыIэгъу афэхъугъэх.А зэпстэумэ адакIоу хэушъ­хьа­фыкIыгъэ дзэ операцием хэлэжьэрэ тидзэкIолIхэм Iэпы­Iэгъу ятыгъэным фытегъэпсыхьэгъэ Iофышхо ашIэ. Ахэм ыкIи нацистхэм заоу арашIылIагъэм ыпкъ къикIэу чIыпIэ къин ифэгъэ цIыфхэм IэпыIэгъу ятыгъэным фэшI рахьыжьэгъэ проектэу «Зэпстэур ТекIоныгъэм пай!» зыфиIорэм къыщыдэлъытагъэу шIушIэ IэпыIэгъу тонн пчъагъэу атIупщыгъэм Iэзэгъу уцхэр, цIыфым анахьэу ищыкIэгъэ пкъыгъохэр, оборудование ыкIи транспорт зэфэшъхьафхэр, нэмыкIыбэхэр хэхьэх. Мы Iоф­шIэным республикэ ыкIи му­ниципальнэ хэбзэ къулыкъухэри, партиеу «Единэ Россием» ишъо­лъыр къутами хэлажьэх.Народнэ фронтым икомандэу Адыгеим Iоф щызышIэрэм сы­фэраз, илъэс 15 ныбжьым пае сыфэгушIо, шIуагъэу щыIэр зэкIэ фэсэIо. ЦIыфхэм афэгумэкIэу, мафэ къэс ипрофессионализмагъэ, мурадхэм зэрафэшъыпкъэр къэзыгъэлъагъоу ащ исатыр хэт пэпчъ «тхьауегъэпсэу» есэIо», — къыщеIо ЛIышъхьэр зыщафэгушIорэ псалъэм.