СамбэмкIэ я XXIV-рэ дунэе команднэ ныбжьыкIэ зэнэкъокъоу «ТекIоныгъ» зыфиIорэр жъоныгъуакIэм и 3 — 4-м Санкт-Петербург щыкIуагъ.
Хэгъэгу зэошхом илъэхъан советскэ цIыфхэм лIыхъужъныгъэу зэрахьагъэм ар фэгъэхьыгъагъ. Турнирым хэлажьэхэрэм шIуфэс тхылъ къафигъэхьыгъ УФ-м и Президентэу Владимир Путиным.Спорт комплексэу «Юбилейнэм» щыкIогъэ зэнэкъокъухэм Урысыем ишъолъыр зэфэшъхьафхэм, Казахстан, нэмыкI къэралыгъохэм къарыкIыгъэ спортсмен 400-м ехъу ахэлэжьагъ. Ахэм илъэс 14 — 16 аныбжь.Къыблэ федеральнэ шъолъырым икомандэ хэтэу Теуцожь районым испорт еджапIэ зыщызыгъэсэрэ ЦIыкIу Аскэр джэрз медаль къыхьыгъ. ТекIоныгъэр Приволжскэ федеральнэ шъолъырым икомандэ къыдихыгъ, ар кIэух едзыгъом Гупчэ федеральнэ шъолъырым нахь лъэшыгъ.
Спорт зэнэкъокъухэм адакIоу патриотическэ мэхьанэ зиIэ Iофтхьабзэхэми ныбжьыкIэхэр ахэлэжьагъэх, тикъэралыгъо къэзыухъумагъэхэм яшIэжь агъэлъэпIагъ. Турнирым зэрищэлIэгъэ спортсменхэм шIуфэс гущыIэхэмкIэ закъыфигъэзагъ УФ-м и Правительствэ и Тхьаматэ игуадзэу Дмитрий Чернышенкэм.Турнирэу «ТекIоныгъэр» 2001-рэ илъэсым къыщегъэжьагъэу рагъэкIокIы ыкIи самбэмкIэ кадетхэм азыфагу щызэхащэрэ Европэм ипервенствэ хэлэжьэщтхэм якъыхэхын пэублэ фэхъу.