Мыекъопэ «Зэкъошныгъэм» ифутболист цIэрыIоу Анатолий Абрамовым ишIэжь фэгъэхьыгъэ зэнэкъокъур я 27-у тиреспубликэ щызэхащэщт.
Тикомандэ щешIэфэ ащ къэлапчъэм Iэгоуи 115-рэ дидзагъ, сэнаущыгъэу, IэпэIэсэныгъэу хэлъымкIэ пстэуми къахэщыгъ. ГухэкI нахь мышIэми, илъэс 46-рэ ныIэп ащ къыгъэшIагъэр, ау мы спорт лъэпкъыр зыгу рихьыхэрэм ащыгъупшэрэп, агъэлъапIэ.1999-рэ илъэсым къыщегъэжьагъэу Адыгеим футболымкIэ и Федерациерэ АР-м физическэ культурэмкIэ ыкIи спортымкIэ и Комитетрэ турнирэу «Абрамовым и Кубок» зыфиIорэр зэхащэ. Мызыгъэгум ешIэгъухэр стадионэу «Юностым» щыкIощтых, командэ 16 текIоныгъэм фэбэнэщт.Мыщ фэгъэхьыгъэ пхъэидзэр рагъэкIокIыгъ АР-м футболымкIэ и Федерацие ипрезидентэу Хьакъунэ Нурбыйрэ спорт журналистэу Бзаго Рустамрэ. Зэнэкъокъум гъогогъуихэ текIоныгъэр къыщыдэзыхыгъэ «Ошъутенэмрэ» шъолъырым дэгъоу щызэлъашIэрэ «Спортмастерымрэ» язэIукIэгъу турнирыр къыгъэдэхэщт.Финалым и 1/8-м щызэIукIэщт командэхэр:«Ошъутен» — «Спортмастер», «Факел» — «Альянс», «Джаджэ» — «Ансар», «Спортмастер-3»— «МФОК-у Ошъутен», «Легион» — «Запереездовские», «Алиро» — «Оазис», «Спортмастер-2» — «Канониры», «Зэкъошныгъ» (Успенскэ район) — «Кавказ».ЖъоныгъуакIэм и 11-м пчэдыжьым сыхьатыр 10-м зэнэкъокъухэр рагъэжьэщтых. Футболыр зыгу рихьыхэрэр ешIэгъухэм яплъынхэу, мы мэхьанэшхо зиIэ cпорт хъугъэ-шIагъэм изы Iахь хъунхэу зэхэщакIохэм рагъэблагъэх.