Къалэм итеплъэ нахь дэхэнэу

Чъыгхэм ягъэтIысхьанкIэ Iофтхьабзэхэу партиеу «Единэ Россием» хэтхэр зыхэлажьэхэрэр Мыекъуапэ щылъагъэкIуатэх.

Мэлылъфэгъум Адыгеим икъэлэ шъхьа­Iэ дэсхэр фабэмкIи, ощхымкIи ыгъэгушIуагъэх. ЧIыопсым изытет зэрэдэгъугъэм къыхэкIэу урамхэм атет чъыгхэр къэгъэгъагъэх. БэшIагъэ Мыекъуапэ анахь къэлэ шхъуантIэхэм захалъытэрэр, ау а цIэ лъапIэр гъэ къэс къэгъэшъыпкъэжьыгъэн фае — джарэущтэу елъытэ Адыгэ Республикэм и ЛIышъхьэу, партиеу «Единэ Россием» ишъолъыр къутамэ и Секретарэу КъумпIыл Мурат.— Мыекъуапэ чъыгхэмрэ куандэхэмрэ бэу къызыщыкIырэ къэлэ гуIэтыпIэу сыдигъуи щытыгъ. Тэ пшъэрылъэу тиIэр ащ итеплъэ къэтыухъумэным имыза­къоу, ар нахь дахэ тшIыныр, джырэ уахътэм диштэу зэтедгъэпсыхьаныр, щыпсэунхэмкIэ, инвестициехэмкIэ, зекIонымкIэ нахь хъопсапIэ тшIыныр ары. Партиеу «Единэ Россиер» тикIэщакIоу экологие проект заулэмэ джыдэдэм тадэлажьэ. Хэбзэ къулыкъухэм, политическэ партиехэм, псэолъэшIхэм, общественнэ движениехэм ялIыкIохэр къыхэдгъэла­жьэхэзэ мы Iофыр лъыдгъэкIотэным мэхьанэшхо иI», — къыIуагъ респуб­ликэм ипащэ.Лъэпкъ программэм диштэу чъыг мини 10-м щыщэу апэрэ миным игъэтIысхьан Мыекъуапэ щыфежьагъэх. Метри 3,5-м къыщымыкIэу зилъэгэгъэщт чъыгхэр ары анахьэу къыхахыщтхэр. Илъэс псаум къалэм итеплъэ дэхэным пае псэе, шхъон­тIэ зэпыт чъыгхэр къыхахынхэу Адыгеим и ЛIышъхьэ игъо афилъэгъугъ. Ащ пшъэрылъ зэришIыгъэм тетэу ныбжьыкIэ, общественнэ движениехэр шIы­хьафхэмрэ экологие Iоф­тхьабзэхэмрэ ахэлажьэх.КъумпIыл Мурати къалэр нахь шхъуантIэ шIыгъэным тегъэпсыхьэгъэ Iофтхьабзэ­хэм иIахь ахешIыхьэ. Рес­публикэм и ЛIышъхьэ, АР-м иминистрэхэм я Кабинет хэтхэр, общественникхэр хэлажьэхэзэ, «Мэздахэм» дэжь бзыф, лэнчъэ, шхъомч, чъыгэе, платан, остыгъэе чъыгхэр щагъэтIысхьагъэх.Спорт комплексэу «Ошъу­тенэм» дэжьи мыщ фэдэ Iофтхьабзэхэр щыкIуа­гъэх. Джащ фэдэу урамхэу Пролетарскэмрэ Пионерскэмрэ къапэIулъ скверхэм, ТекIоныгъэм ибульвар чъы­­гыкIэхэр ащагъэтIысхьагъэх. Мыекъуапэ имэрэу, партиеу «Единэ Россием» ичIыпIэ къутамэ исекретарэу Геннадий Митрофановыр мыщ фэдэ Iофтхьабзэхэм ренэу ахэлажьэ.— Мыекъуапэ нахь шхъуантIэ шIыгъэ­ным тегъэпсыхьэгъэ Iофтхьабзэр лъытэгъэкIуатэ. ТекIоныгъэм ибульвар лэнчъэ чъыг 70-м ехъу щыдгъэтIысхьагъ. Партиеу «Единэ Россием» ишъолъыр къутамэ и Секретарэу, Адыгеим и ЛIышъхьэу КъумпIыл Мурат пшъэрылъ къызэрэтфишIыгъэм тетэу мы мазэм а лъэныкъом­кIэ Iофхэр нахь дгъэлъэшыгъэх. Мэлылъфэгъум иаужырэ мэфэ чъыIэтагъэхэр къызфэдгъэфедэхэзэ, чъыгхэр тэгъэтIыс­хьэх. Чэщыр хэкIотагъэу чъыг лъапсэхэр къытлъагъэIэсыгъагъэхэми, тиныбжьыкIэ хъупхъэхэр зы сыхьаткIэ къызэрэугъоигъэх. Ахэр партиеу «Единэ Россием», «Апэрэхэм я Движение», «Гвардие ныбжьыкIэм», гуфэкIо движениеу «Майкоп Молодой» зыфиIохэрэм ялIыкIохэр, юнармейцэхэр ары. Сыдигъуи IэпыIэгъу къытфэхъуным зэрэфэхьазырхэм фэшI ахэм лъэшэу сафэраз. Бжыхьэм джыри ТекIоныгъэм ибульвар чъыгыкIэхэр щыдгъэтIысхьащтых, — къыIуагъ Геннадий Алексей ыкъом.КультурэмкIэ къэлэ паркми мыщ фэдэ Iофтхьабзэхэр щызэхащагъэх. Адыгеим икъэлэ шъхьаIэ щыпсэухэрэми, ихьакIэхэми мы чIыпIэр якIуапI. Республикэ, къэлэ къулыкъухэм яIофышIэхэм, партиеу «Единэ Россием» хэтхэр, ныбжьыкIэхэр, гуфакIохэр, къэлэдэс къызэрыкIохэр къызэрэугъоигъагъэх чъыгыкIэхэр паркым щагъэтIысхьанхэу.— Мыекъуапэ нахь шхъуантIэ шIыгъэ­ным тегъэпсыхьэгъэ Iофтхьабзэхэр тапэкIи лъыдгъэкIотэщтых. ЗэшIотхын фаеу бэ джыри къытпыщылъыр, ау ткIуа­чIэ зэхатлъхьэмэ, кIэухышIухэм такъы­фэкIон тлъэкIынэу сэгугъэ. Тикъалэ итеплъэ нахь дахэ хъуным фэгумэкIырэ пстэуми «тхьашъуегъэпсэу» ясэIо. Мые­къуапэ нахь шхъуантIэ, нахь кIэракIэ тшIын зэрэтлъэкIыщтым сицыхьэ телъ! — къы­Iуагъ Мыекъопэ къэлэ администрацием ипащэ.Александра Балабась.