Теннис цIыкIумкIэ Къыблэ федеральнэ шъолъырым изэнэкъокъу къалэу Славянск-на-Кубани щэкIо.
Мыщ зыныбжь илъэс 14-м емыхъугъэ кIалэхэр ыкIи пшъашъэхэр хэлажьэх.Ащ иапэрэ мафэ Адыгеим икомандэ гъэхъагъэ щишIыгъ, хагъэунэфыкIырэ чIыпIэ къыдихыгъ. Республикэр къэзыгъэлъагъохэрэр Мыекъуапэ испорт еджапIэу С.М. Джэнчатэм ыцIэ зыхьырэм ыкIи Кощхьэблэ районым ипсэупIэу Вольнэм икIэлэцIыкIу-ныбжьыкIэ спорт еджапIэ защызыгъасэхэрэр ары. Типшъашъэхэм якомандэ иешIэкIо шъхьаIэ шъобж тещагъэ зэрэхъугъэм къыхэкIэу хэлэжьэн ылъэкIыгъэп, тилIыкIохэм аужырэ, я 8-рэ чIыпIэр къыдахыгъ. ТикIалэхэр зэрэлъэшхэр джыри зэ къагъэшъыпкъэжьыгъ, ахэм якомандэ ящэнэрэ чIыпIэр къыфагъэшъошагъ. Тиспортсменхэм 3:1-у Къалмыкъым итеннисистхэм къашIуахьыгъ, ау Ростов хэкур къатекIуагъ. Мы зэIукIэгъум тикомандэ очко закъо къыщыфэзыхьыгъэр Арсений Семеновыр ары. Краснодар краим пэрытныгъэр ыубытыгъ.КIалэхэр ыкIи пшъашъэхэр джыри зэнэкъокъущтых, арышъ, тиреспубликэ илIыкIохэм гъэхъэгъэшIухэр ашIынхэу афэтэIо.