Спорт зекIонымкIэ зэнэкъокъухэр къутырэу Козополянскэм игъэхъунэу Тихаям щыкIуагъэх.
Iофтхьабзэм кIэщакIо фэхъугъ Джэджэ районым икIэлэцIыкIу-ныбжьыкIэ спорт еджапIэу А.Ж. Галстян ыцIэ зыхьырэр.ЗэкIэмкIи мыщ нэбгыри 114-рэ хэлэжьагъ. Ахэр къалэу Мыекъуапэ, Джэджэ, Теуцожь, Красногвардейскэ районхэм, Краснодар краимкIэ Апшеронскэ къарыкIыгъэх.Спортсменхэр зэнэкъокъугъэх, зекIонымкIэ IэпэIэсэныгъэу аIэкIэлъыр къагъэлъэгъуагъ, япсауныгъэ агъэпытагъ, тичIыопс идэхагъэ зэрагъэлъэгъугъ, загъэпсэфыгъ.Мэлылъфэгъум ыкIэм спорт зекIонымкIэ Адыгэ Республикэм ия 26-рэ первенствэ рагъэкIокIыщт. Ащ спортсменхэм дэгъоу зыфагъэхьазырыным мы Iофтхьабзэр фэIорышIагъ.Зэнэкъокъум текIоныгъэр ыкIи хагъэунэфыкIырэ чIыпIэхэр къыщыдэзыхыгъэхэр агъэшIуагъэх, къалэжьыгъэ тынхэр аратыжьыгъэх.