УФ-м теннис цIыкIумкIэ и Федерацие ипрограммэу «Урысыем инеущырэ маф» зыфиIорэм къыдыхэлъытагъэу мы спорт лъэпкъымкIэ зэнэкъокъухэр Мыекъуапэ щыкIуагъэх. Адыгеим илIыкIохэм гъэхъэгъэшIухэр ашIыгъэх, медали 4 къахьыгъ.
Мы программэм ишIуагъэкIэ зыныбжь илъэс 18-м емыхъугъэхэм ахъщэ IэпыIэгъу арагъэгъотын алъэкIы. 2026-рэ илъэсымкIэ мыр апэрэ турнир, зэкIэмкIи 6 зэхащэнэу агъэнафэ. Мызыгъэгум республикэм икъэлэ шъхьаIэ къыщызэрэугъоигъэх Краснодар ыкIи Ставрополь крайхэм, Ростов хэкум, Къырым, федеральнэ мэхьанэ зиIэ чIыпIэу «Сириусым» ялIыкIохэр. Адыгеир нэбгырэ 50 фэдизмэ къагъэлъэгъуагъ. Зыныбжь илъэс 12-м, 14-м ыкIи 18-м емыхъугъэ кIалэхэмрэ пшъашъэхэмрэ заушэтыгъ.Унэе зэнэкъокъухэм адакIоу нэбгыритIоу зэгъусэхэми яухьазырыныгъэ къагъэлъэгъон амал яIагъ. Адыгеир пштэмэ, анахь дэгъоу зыкъэзыгъэлъэгъуагъэхэр Кощхьэблэ районым ипсэупIэу Вольнэм итеннисистхэр ары. Ахэр Игорь Асоцкэм егъасэх. Пелагея Калининам джэрз ыкIи дышъэ медальхэр къыфагъэшъошагъэх. Даниил Казарцевымрэ Дмитрий Газарянрэ, Дарья Кузнецовамрэ Елизавета Калининамрэ хагъэунэфыкIырэ чIыпIэхэр къыдахыгъэх.Зэнэкъокъум текIоныгъэ къыщыдахыгъ Станислав Луппа (Ростов-на-Дону), Даниил Казарцевым, Михаил Абраменкэм (тIури Шытхьал), Ксения Харевам (Симферополь), Алиса Дроновам (Ставрополь). НэбыгыритIоу зэгъусэхэмкIэ анахь лъэшыгъэх Еремей Кареловымрэ Максим Третьяковымрэ (Ставрополь), Кристина Шихахмедовамрэ Анастасия Плахутарэ (ТIуапсэ), Еремей Кареловымрэ Владислава Яроваямрэ (Ставрополь ыкIи Шъачэ).