ИIофшIакIэ аушэтыгъ

Мы мазэм АР-м псауныгъэр къэухъумэгъэнымкIэ и Министерствэ уплъэкIун шIыкIэм тетэу приложениякIэу «ТМК пациент» зыфи­Iорэр ыгъэлэжьагъ. Врачыр пэIудзыгъэу сыма­джэм IэпыIэгъу ри­гъэ­гъотыныр, зыгъэгумэкIырэ упчIэхэр зэхафынхэр ащ ипшъэрылъ.

АР-м псауныгъэр къэухъумэгъэнымкIэ и Министерств

АдыгеимкIэ ащ хэлэжьагъэр IэзэпIищ: Ханскэм дэтыр, Мые­къопэ къэ­лэ поликлиникэр, Тэ­хъутэмыкъое районым игупчэ сы­мэ­джэщ. Мыхэм цIыфыбэ яуа­лIэ. Ахэм якъыхэхынкIи ары зэрыгъозагъэ­хэр — сымаджэхэр жъу­гъэу зэ­кIуалIэхэрэр ыпэ рагъэшъыгъэх.

— Приложениер зытегъэ­псы­хьагъэр ипсауныгъэ изытет ренэу зыуплъэкIунэу фэе сымаджэхэр ары. ГущыIэм пае, шъоущыгъу узым ыгъэгумэкIы­хэрэр. Апэ врачым уекIолIэн фае, ащ ыуж ар пэIудзыгъэ шIыкIэм тетын ылъэкIыщт. Врачми сымаджэхэми яуахътэ къызэтегъэнэгъэным приложениер тегъэпсыхьагъ, Iэрыфэгъу. Зи­псауныгъэ зэщыкъуагъэм гъогум уахътэ тыригъэкIодэщтэп, чэзыум хэтыщтэп, — къытфи­Iотагъ медицинэ къэбар-лъыгъэIэс гупчэм иотдел ипащэу Екатерина Никитинам.

ПриложениякIэм телефоным фэдэу Iоф ешIэ. Сымаджэм къызыфытеохэкIэ, хьазырэу щы­сын фае. Ащ нэмыкIэу, вра­чым дэжь зыхэптхэн, узэрэсымаджэр къэзыушыхьатырэ тхы­лъым ухэплъэн е нэмыкI медицинэ къэбархэр къипхын плъэ­кIынэу ар гъэпсыгъэщт.
Ащ иIофшIэн зэрэгъэпсыгъэм епхыгъэ апэрэ уплъэкIуныр ыкIэм фэкIуагъ, зэфэхьысыжьхэри фашIыгъэх.

 

— Приложениер зытыуплъэ­кIугъэ щылэ мазэм къыкIоцI сымэджипшIым нахьыбэ пэIу­дзыгъэу врачым дэгущыIагъэх. Пчъагъэр нахьыбэни ылъэкIыщтыгъ, ау ыпшъэкIэ къызэрэщысIуагъэу, мыщ фэдэ амал зиIэхэр диспансер учетым хэтэу илъэс пчъагъэхэм зипсауныгъэ лъыплъэхэрэр ары. ПстэумкIи приложениер Iэрыфэгъу, ау зы­тыушэтыгъэ пIалъэм къы­кIоцI щыкIагъэхэр къыхэдгъэщыгъэх. Ежь врачхэми яшIошIхэр къядгъэIуагъэх. Арышъ, анаIэ зы­тырагъэтыщ лъэныкъохэр дгъэ­нафэхи, приложением джыри дэлэжьэжьынхэу ащ фэгъэза­гъэхэм ятIуагъ, — къыIуагъ Екатерина Никитинам.

ЩыкIагъэхэм ядэгъэзыжьын дэлажьэхэмэ, приложением иIоф­шIакIэ джыри зэ IэзапIэхэм ащаушэтыщт. Ренэу рылэжьэщтхэмэ ащ къыгъэлъагъорэм изэфэхьысыжь елъытыгъэщт.

Анцокъо Ирин.