Тыжьын медалым итын аублэжьыщт

2023 — 2024-рэ еджэгъу илъэсым гурыт еджапIэхэм зэхъокIы­ны­гъэу афэхъугъэхэм ащыщ я II-рэ шъуашэ зиIэ медальхэр ара­ты­хэу зэраублэжьыщтыр.

Шъугу къэдгъэкIыжьын 2014-рэ илъэсым УФ-м просвещениемкIэ и Министерствэ еджапIэр къэзыухыхэрэм дышъэ медаль нэмыкI арамытыжьынэу унашъо зэришIыгъагъэр.

Аужырэ илъэсипшIым аттеста­тым зы предметымкIэ е тIумкIэ оценкэу «4» зыхэтхэм фэгъэ­кIотэныгъэ зыпари зи яIагъэп. Мы илъэсым ижъоныгъокIэ мазэ УФ-м просвещениемкIэ иминистрэу

Сергей Кравцовым ты­жьын медальхэр араты зэрэ­хъужьыщтыр къыIуагъ. Ащ шапхъэу пылъхэр Iоныгъом и 29-м къыгъэнэфагъэх.

Дышъэ ыкIи тыжьын медальхэр гурыт еджапIэр къэзыухыхэ­рэм афэгъэшъошэгъэнхэм шап­хъэу пылъхэм мы мафэхэм та­щи­гъэ­гъозагъ АР-м гъэсэныгъэмрэ шIэныгъэмрэкIэ и Министерствэ.

Ыпэрэ илъэсхэм афэдэу ды­шъэ медалыр къаратыным пае еджэнымкIэ гъэхъэгъэ инхэр кIэлэеджакIохэм ашIынхэ, «5» закIэкIэ еджэнхэ, зыкI къэралы­гъо ушэтынхэмкIэ яшIэныгъэхэр къаушыхьатыжьынхэ фае. ШIокI имыIэу урысыбзэмкIэ ыкIи ащ нэмыкI зы предметымкIэ анахь макIэу балл 70-рэ къырихынэу щыт. Базово хьисапыр къыхэзы­хыхэрэм балли 5 къахьын фае. Джащ фэдэу къэралыгъо зэфэ­хьысыжь ушэтынхэр зытыхэрэми «5» нахь макIэ къахьынэу щытэп.

Я II-рэ шъуашэ зиIэ, тыжьын медалыр зыфагъэшъошэщтыр дэгъоу еджэу, зы предметымкIэ е предметитIумкIэ оценкэу «4» зиIэхэр ары. Шапхъэхэм адиштэу урысыбзэмкIэ ыкIи ежь къыхи­хырэ зы предметымкIэ зыкI къэ­ралыгъо ушэтынхэм анахь макIэу балл 60 къащихьын фае.

Аттестатым игъусэу медальхэр еджапIэр къэзыухыхэрэм аратыжьыщтых. Зэрагъэнафэ­рэмкIэ, тыжьын медаль зиIэ ныбжьыкIэхэр апшъэрэ еджапIэ­хэм ачIэхьанхэм пае фэгъэкIо­тэнхэр, балл тедзэхэр яIэщтых, ар зыфэдизыщтыр бэ темышIэу къэнэфэщт.

Тыжьын медалым итын зэраублэжьырэм фэгъэхьыгъэу ны-тыхэм гущыIэгъу тафэхъугъ, яшIошI къыраIотыкIыгъ.

— КIэлэеджакIохэр нахь дэ­гъоу еджэнхэмкIэ ишIуагъэ къэ­кIощт тыжьын медалым итын къызэрэхагъэхьажьыгъэм. Гурыт еджапIэр оценкэу «4» зы предметымкIэ е тIумкIэ хэтэу къэу­ухыныри IэшIэхэп. Илъэс пчъа­гъэм гъэхъагъэ ашIызэ зэре­джа­гъэхэм джы фэгъэкIотэнхэр къы­зэрэкIэлъыкIощтыр зызэхэтэхым, тигуапэ хъугъэ, — еIо я 10-рэ классым щеджэрэ пшъэ­шъэжъыем янэу Фатимэ.

— Тыжьын медалым итын къызэрэрагъэжьэжьыгъэр кIэлэцIыкIухэмкIэ дэгъу дэд, сыда пIомэ дышъэ медалыр къахьынымкIэ зы предмет горэ къа­фэ­­хьылъэу кIэлэеджакIохэм къы­хэкIы. Ар еджапIэр къэзыухырэм­кIи, ны-тыхэмкIи гухэкI мэ­хъу. Сипшъэшъэжъые дэгъоу еджэ, ау зыгорэкIэ дышъэ медалым нимыгъэсышъугъэми, тыжьыныр къылэжьымэ, ащи гугъапIэхэр къытыщтых. Зыфэе апшъэрэ еджапIэм чIэхьанымкIэ IэпыIэгъу къыфэхъунэу сэгугъэ, — еIо я 9-рэ классым ис пшъэшъэ­жъыем янэу Сусанэ.

ДЕЛЭКЪО Анет.