Шапсыгъэ псыIыгъыпIэр агъэцэкIэжьы

Шапсыгъэ псыIыгъыпIэм игъэцэкIэжьын 2026-рэ илъэсым ехъулIэу аухыщт.

Мы илъэсым имэкъуогъу маз ащ игъэцэкIэжьын иятIонэрэ чэзыу зырагъэжьагъэр, ар мэкъу-мэщым хэхъоныгъэ егъэшIыгъэным ыкIи мэкъумэщ продукцием ибэдзэр гъэIорышIэгъэнымкIэ къэралыгъо программэм къыдыхэлъытагъэу щыт. Шъугу къэдгъэкIыжьын, гъэцэкIэжьыным иапэрэ чэзыу 2008-рэ илъэсым рагъэжьэгъагъ ыкIи 2016 — 2017-рэ илъэсхэм падзэжьыгъагъ.

ГъэIорышIапIэу «Адыгеямелиоводхозым» къызэрэщаIуагъэмкIэ, къэралыгъо зэзэгъыныгъэм елъытыгъэу гъэцэкIэжьынхэм джыри илъэситIо апылъыщтых. Организациеу а IофшIэныр зыпшъэ дэкIырэр непэ адэлажьэ гидропсэуалъэхэмрэ гъэчъыгъэхэмрэ якъыхэхыжьын, нэужым лъэмыдж зэпырыкIыпIэм ычIыпIэкIэ гъогу тедзэ ашIыщт.

Мэкъу-мэщымкIэ АР-м и Министерствэ къызэрэщаIуагъэмкIэ, псыIыгъыпIэм псэу итым къыщыкIагъ. ГъэцэкIэжьынхэр заухырэм ыуж кубическэ метрэ миллиони 100-м нагъэсыщт ащ псэу итыр. Адыгеим имызакъоу, Краснодар краим ипынджшIапIэхэми ащ ишIуагъэ екIыщт. ПцэжъыехъупIэу псыIыгъыпIэр зэгорэм щытыгъ, ащи къыфагъэзэжьын гухъэлъ яI, пцэжъые мин 85-рэ хатIупщыхьащт. Джащ фэд, псыIыгъыпIэр зэтырагъэпсыхьажьмэ, псыкъиуныр нахь макIэ хъунэу Iэшъхьэтетхэр мэгугъэх.

Шапсыгъэ псыIыгъыпIэр 1939 — 1952-рэ илъэсхэм агъэпсыгъагъ, псыхъоу Афыпсэ икъежьапIэкIэ дзыгъэ. Ар зэратIупщыщтым фэгъэхьыгъэ документым ежь ышъхьэкIэ Сталиныр кIэтхэжьыгъагъ.

Шапсыгъэ псыIыгъыпIэм чIыпIэу ыубытырэр квадратнэ километрэ 46-рэ, икIыхьагъэкIэ километри 9, ишъомбгъуагъэкIэ километри 8, икууагъэкIэ метри 3,5-рэ мэхъу.