ЛIышъхьэм изэдэгущыIэгъу занкI

Хабзэ зэрэхъугъэу, Ады­геим и ЛIышъхьэ илъэсым ыкIэхэм адэжь зэдэгущыIэгъу занкIэ цIыфхэм адыриIэщт. Мы илъэсым ар тыгъэгъазэм и 7-м щыIэщт. ШэкIогъум и 27-м щегъэжьагъэу къулы­къоу 122-мкIэ упчIэхэр аугъо­и­хэу аублагъ. Кол-гуп­чэм иоператорхэм IофшIэгъу мафэхэм пчэдыжьым сыхьатыр 8-м къыщегъэ­жьагъэу пчыхьэм сыхьатыр 8-м нэс, зыгъэпсэфыгъо ма­фэ­хэм пчэдыжьым сыхьа­тыр 8-м къыщегъэжьагъэу 2-м нэс упчIэхэр атхыщтых. Джащ фэдэу чат-боткIэ, kumpilov-online@mail.ru зы­фи­IорэмкIэ электрон шIыкIэ­кIэ упчIэхэр аратын алъэ­кIыщт.

— Къэралыгъо телерадио­компаниеу «АдыгеимкIэ» шъуиупчIэхэм джэуап къяс­ты­жьыщт, шъузыгъэгумэкIырэ Iофыгъохэм язэшIохынкIэ IэпыIэгъу сышъуфэхъущт, къи­хьащт илъэсымкIэ гухэ­лъэу тиIэхэм сакъыте­гущы­Iэщт. ГъэрекIо нафэ къызэ­рэхъугъэмкIэ, респуб­ли­кэм ис нэбгырабэм къулыкъоу 122-мкIэ упчIэхэр аратыныр ашIоIэрыфэгъоу щыт. Зэдэ­гущыIэгъу занкIэм илъэхъан зигъо тимыфэрэ Iофыгъохэм язэшIохын ыужкIи тынаIэ тедгъэтыщт. Къулыкъухэм, муниципа­литетхэм пшъэрылъ гъэнэфа­гъэхэр афэсшIыщтых. Iофы­гъо пэпчъ рыкIорэм сшъхьэ­кIэ гъунэ лъысфыщт, — къы­Iуагъ Адыгеим и ЛIышъхьэ.

Тыгъэгъазэм и 7-м пчы­хьэм сыхьатыр 5-м каналэу «Россия 24» зыфиIорэмкIэ зэдэгущыIэгъу занкIэр къа­тыщт. Джащ фэдэу Къэра­лыгъо телерадио­компаниеу «Адыгеим» исайткIи, плат­формэу «Смотрим», телека­на­лэу «Кав­каз 24» зыфиIохэ­рэмкIи а зэдэгущыIэгъум шъуеплъын шъулъэкIыщт.