«Уджым» цIыфхэр егъэуджых

Лъэпкъ Iэмэ-псымэхэмкIэ Тэхъу­тэмыкъое районым илъэпкъ ансамблэу «Уджыр» зызэхащагъэр илъэс 30 зэрэхъугъэр хигъэунэфыкIыгъ.

Ащ фэгъэхьыгъэ мэфэкI концерт АР-м и Лъэпкъ театрэ къыщатыгъ.

АР-м культурэмкIэ иминистрэ игуа­дзэу Кушъу Светланэ къэгъэлъэгъоным къе­кIолIэгъэ хьакIэхэм пэублэ гущыIэ­кIэ закъыфигъэзагъ.

— «Уджым» непэ имэфэкI. Адыгеим икомпозитор цIэрыIоу Лъэцэрыкъо Кимэ купым гъогоу фыхихыгъэм тетэу мэлажьэ. ГъэшIэгъонэу мыхэм ахэслъа­гъорэр къышъосIон, кIэу къахахьэрэр ахэкIуакIэ, нахьыжъэу ахэтым щысэ тырахы. Купым Кавказ икъушъхьэ сыдж­хэр гум къегъэкIы, урэгушхо, — къыIуагъ министрэм игуадзэ.

Хы ШIуцIэ Iушъом щыпсэухэрэ шапсыгъэхэм я Адыгэ Хасэ итхьаматэу КIакIыхъу Мэджыдэ «Уджым» гущыIэ фабэхэр къыфиIуагъэх ыкIи рэзэныгъэ тхылъ къыфигъэшъошагъ.

АР-м изаслуженнэ артистэу Ацумыжъ Адам мэфэкI концертыр дахэу зэрищагъ. Лъэпкъ орэдыIо куп­хэу «Адыгэхэр», «Къамыл» зыфиIохэ­рэр, АР-м изас­луженнэ артистэу Быщтэкъо Азэмат, КъБР-м изаслуженнэ артисэу Бэрбэч Аскэр концертым хэлэ­жьагъэх.

«Уджым» фэгъэхьыгъэу

1993-рэ илъэсым ансамблэу «Уджыр» зэха­щагъ. Адыгэ Респуб­ликэм икультурэ къэзыгъэ­дэхэрэ творческэ купыр зыми фэдэп. Артистхэм ижъырэ лъэпкъ орэд­хэр къаухъумэ, шыкIэпщынэ бзэпсыхэр къагъэгущыIэу, къамылымкIэ адыгэ мэкъамэхэр агъэ­жъынчы. Лъэп­къыбэ зыщып­сэурэ Урысыеми, IэкIыб хэгъэ­гухэми шIукIэ ащызэ­лъашIэ. Адыгеим илIыкIоу купыр нэмыкI шъолъыр­хэм ащыкIорэ Iофтхьабзэхэм бэрэ ахэлажьэ.
— Адыгэ Республикэм культурэмкIэ изаслуженнэ IофышIэу Таймэз Щамсудин ары ащ икIэщакIор. Апэрэ илъэс шъыпкъэм ансамблэм «народный» зыфиIорэ цIэ лъапIэр къыфагъэшъошагъ.

2003-рэ илъэсым Урысыем, Адыгеим ыкIи Пшызэ культурэмкIэ язаслуженнэ IофышIэу КIыргъ Юрэ пащэ фэхъугъ. 2013-м щегъэжьагъэу сэ купым сыри­пащ», — еIо Адыгэ Республикэм изаслуженнэ артистэу Къэлэкъутэкъо Инвер.

2021-рэ илъэсым «Уджыр» лъэпкъ проектэу «Культурэм» хэлажьи, лъэпкъ самодеятельнэ купхэм язэнэкъокъу текIоныгъэр къыщыдихыгъ, грантэу сомэ миллиони 2 къыфагъэшъошагъ.

«2016-м щегъэжьагъэу Урысыем ыкIи IэкIыбым ащызэхащэрэ фести­вальхэм, зэнэкъокъухэм чанэу тахэ­лажьэ, — лъегъэкIуатэ игущыIэ Къэлэ­къутэкъо Инвер. — 2022-рэ илъэсым купым «Заслу­женный коллектив на­род­ного творчества» зыфиIорэ щытхъу­цIэр къыфа3гъэшъошагъ. Урысые фести­ва­лэу «ЦIыф лъэпкъыбэ зыщыпсэурэ Урысыер» зыфиIоу къалэу Грознэм щыкIуагъэм илауреат тыхъугъ. Тыркуем, нэмыкI чIыпIабэхэм тащыIагъ, гъэхъа­гъэхэр тшIыгъэх».

Уджым нэбгыри 7 хэт: КIыргъ Юр, ШъэуапцIэкъо Адам, Темрыкъо Адам, ШъхьэкIумыдэ Хъаджислъан, Мышъэ Аслъан, Тыкъо Рустам, звукорежиссерыр Хъут Заур.

Купым къыхихыгъэ гъогум зыригъэу­шъомбгъуныр ипшъэрылъ шъхьаIэу елъытэ. Лъэпкъхэм адыгэ музыкальнэ искусствэр нахьышIоу ашIэ зэрэхъурэм, адыгэхэм язэлъыIэсыкIэ амалхэр зэрэпытэхэрэм ансамблэм иIахьышIу хэлъ. «Уджым» цIыфхэр егъэуджы.

ЛЪЭПШЪЫКЪО Фатим.