Тхьамаф къэнагъэр

2022-рэ илъэсымкIэ хэбзэ­Iахьхэм ятын зигугъу тшIырэр. Хэбзэгъэуцугъэм къызэ­рэщыдэлъытагъэмкIэ, тыгъэ­гъазэм и 1-р къэмысызэ физическэ лицэхэм ямылъку пае ар атын фае.

Шъугу къэдгъэкIыжьын, мылъкум пае хэбзэIахь зытыхэрэр унэе чIылъэ унэ, фэтэр, гараж, автомобиль, ащ пае уцупIэ гъэ­нэфагъэ, амыухыгъэу псэолъэ ныкъошI е нэмыкI унэ зиIэ физи­ческэ лицэхэр ары. Щагу хъыз­мэтым, хэтэ е чъыгхэтэ лэжьыным, псэупIэ щигъэуцуным атегъэпсыхьэгъэ чIыгу Iахьхэр унэе псэупIэхэм ахэхьэх. Фэтэрыбэу зэхэт унэхэм ачIэсхэм зэдагъэфе­дэхэрэм апае хэбзэIахь ­атырэп.

Джащ фэдэу цIыфым нахьыпэкIэ гъотэу мазэм иIэм ипроцент 13-р НДФЛ-у ытыщтыгъэу, нэужым игъот сомэ миллиони 5-м ехъугъэмэ, джа ехъугъэм ипроцент 15-р ытын фаеу мэхъу.
Мылъкум пае хэбзэIахьыр кадастрэ уасэм къыпкъырыкIхэзэ агъэнафэ. ГурытымкIэ лъытагъэу, ащ ипроцент 0,1-м фэдиз хэбзэ­Iахьыр. Арэу щытми, «Российскэ гъэзетым» къызэритырэмкIэ, шъо­лъыр пэпчъ нэмыкIэу ар къылъытэн фит.

Мы лъэныкъом фэгъэзэгъэ къулыкъум къызэрэщаIуагъэмкIэ, игъом хэбзэIахьыр зымытыгъэм хэгъэхъуагъэу ар къыфалъытэнэу УФ-м хэбзэIахьхэмкIэ и Кодекс ия 75-рэ статья къыщыдэлъытагъ. ЦIыфым чIыфэу телъыр сомэ мини 10-м шIокIыгъэмэ, иIоф хьыкумыр хэплъэнэу фагъэхьыщт.

Зыныбжь имыкъугъэу мылъку зиIэхэм, гущыIэм пае, унэр ны мылъкумкIэ къащэфыгъэу кIэлэцIыкIум тетхагъэмэ, ащ ычIыпIэкIэ хэбзэIахьыр зытын фаер янэ-ятэхэр е лъыплъэнэу агъэнэфагъэр ары. КIэлэцIыкIум ИНН фагъэпсыгъэмэ, «унэе кабинетым» е «мобильнэ приложением» ащыптын плъэкIыщт. ИНН-р мыгъэпсыгъэмэ, хэбзэIахьхэмкIэ къулыкъум, МФЦ-м, почтэм е банкым ащыптын амал щыI.

Унэ, транспорт е чIыгу Iахь уиIэу, ау хэбзэIахьхэмкIэ къулыкъур щымыгъэгъозагъэмэ, нахь лъэпIэжьэу къызэрэпфыдэкIыщтыри къулыкъум къыщыхагъэщыгъ. О ямыIуагъэу, ежьхэр щыгъуазэ зыхъухэкIэ, птын фаем ахъщэ (пеня) тырагъэхъощт.