ЕмтIылъ Зауркъан Къамболэт ыкъор

Адыгеим ипромышленность изаслуженнэ IофышIэу, Мыекъопэ машинэшI заводым игенеральнэ пэщагъэу ЕмтIылъ Заур­къан Къамболэт ыкъом идунай ыхъожьыгъ.

З. Къ. ЕмтIылъым Адыгеим иэкономикэрэ ипромышленнострэ яхэ­хъоныгъэ иIахьы­шхо хишIыхьагъ, Мые­къопэ машинэшI заводым илъэсыбэрэ ипэщагъ. Я ХХ-рэ лIэшIэгъум икIэух — я ХХI-рэ лIэшIэгъум иублэгъу экономикэр лъэшэу хэгъэгум къызщеIы­хыгъэгъэ лъэхъаным предприятиер къызэте­нэжьын езыгъэлъэкIыгъэр ЕмтIылъ Заур­къанрэ ащ хъупхъэу дэ­лэжьагъэхэмрэ ары. Техническэ шIэныгъэ­хэмкIэ докторэу зэрэщытыгъэм, илъэсыбэрэ IэнэтIэ зэфэшъхьафхэр заводым зэрэщигъэцэкIагъэхэм къахэкIэу производствэ Iофхэм дэгъоу ар ащыгъозагъ, уахътэм диштэу предприятиер зэтыригъэ­псыхьан ылъэкIыгъ. Джырэ шапхъэхэм ади­штэрэ гидроманипуляторхэр заводым къыщыдагъэкIыщтыгъэх.

ЕмтIылъ Зауркъан МКъТУ-м технологиемкIэ, машинэхэмкIэ ыкIи гъомылэпхъэшI оборудованиемкIэ икафедрэ ипрофессорыгъ, Адыге­им иэкономикэ иот­раслэ зэфэшъхьафхэм ащылэжьэщтхэм якъэгъэхьазырын иIахьы­шхо хишIыхьагъ. Общественнэ Iофхэм ча­нэу ахэлажьэщтыгъ, промышленникхэмрэ предпринимательхэмрэ я Союз Адыгеим щызэхэщэгъэным кIэщакIо фэхъугъэхэм ащыщыгъ. ЦIыфхэм ишIуагъэ зэраригъэкIыщтым ренэу ыуж итыгъ, гъот макIэ зиIэхэм илъэсыбэрэ лъэпкъ гъэзетыр къафыритхыкIыгъ.

Гъэзетэу «Адыгэ ма­къэм» иредакцие щылажьэхэрэм гухэ­кIышхо ащыхъугъ ЕмтIылъ Зауркъан Къам­болэт ыкъом идунай зэрихъожьыгъэр ыкIи щымыIэжьым игу­псэ­хэмрэ иIахьылхэмрэ афэтхьаусыхэх.