ХьакIэхэр нахь лъэшыгъэх

Урысыем ичемпионат и Суперлигэ хэлэжьэрэ «АГУ-Адыифым» мы мафэхэм зичэзыу ешIэгъу Мыекъуапэ щыриIагъ. Командэу «Став­ропольер» тихьэкIагъ.

«АГУ-Адыиф» (Мыекъуапэ) — «Ставрополье» (Ставрополь) — 30:33 (15:16).

Адыгеим игандболисткэхэм текIоныгъэр къызыдахкIэ очко пчъагъэу яIэм хагъэхъонышъ, нахь дэкIоенхэ алъэкIыщтыгъ. Ау хьакIэхэр ащ къезэгъыгъэхэп, ахэм ешIакIэу къагъэлъэгъуагъэм тикомандэ фэхьазырыгъэп. Я 28-рэ такъикъ закъор ары бысымхэр ыпэ ишъынхэ залъэкIыгъэр. Тигандболисткэу Алиса Дворцеваям гъогогъу 11-рэ Iэ­гуаор къэлапчъэм дидзагъ, ар тикомандэкIэ ешIэкIо анахь дэгъоу къыхагъэщыгъ. Ау хьакIэхэр нахь лъэшыгъэх, текIоныгъэр къыдахыгъ.

Джы «Ставропольер» я 8-рэ чIыпIэм щыт, «АГУ-Адыифым» зэкIэлъыкIоу ешIэгъуи 5 шIуахьыгъ ыкIи я 10-рэ чIыпIэр еубы­ты. Пэрытныгъэр зыIыгъыр коман­дэу «Ростов-Дон».

Урысыем и Кубок икъыдэхын фэгъэхьыгъэ зэIукIэгъу мы коман­дитIум джыри зэдыряIэщт. Ар шэкIогъум и 27-м Ставрополь щыкIощт.

Командэхэр зыдэщыт чIыпIэхэр ыкIи очко ­пчъагъэу рагъэкъугъэр:

1. «Ростов-Дон» — 26.
2. «ЦСКА» — 23.
3. «Черноморочка» — 20.
4. «Астраханочка — 19.
5. «Лада» — 17.
6. «Кубань» — 17.
7. «Динамо-Синара» — 15.
8. «Ставрополье» — 10.
9. «Звезда» — 8.
10. «АГУ-Адыиф» — 7.
11. «Луч» — 4.
12. «Университет» — 0.