Советскэ дзэхэм фашистхэм ядзэ шъхьаIэу дзэкIолI миныбэ зыхэтыгъэр зыщызэхакъутэгъэ зэо пхъашэхэр Сталинград дэжь зыщыкIуагъэхэр илъэс 80 хъугъэ. Дзэ Плъыжьым иартиллерии ащ фэдэ гъэхъэгъэшхом иIахьышIу зэрэхишIыхьагъэм щэч хэлъэп.
1942-рэ илъэсым шэкIогъум и 19-м советскэ артиллерием пыим лъэшэу Сталинград дэжь щыжэхэкIуатэу, утынышхо щырихэу ригъэжьагъ. ИпхъэшагъэкIэ, чIыпIэу зэлъиубытыщтыгъэмкIэ чэщ-мэфэ 75-рэ кIогъэ заом фэдэ тарихъым къыхэфагъэп пIоми хъущт. Лъыбэ зыщагъэчъэгъэ, пыйхэр пхъашэу зыщызэпэуцужьыгъэхэ зэуабэ Сталинград иIэгъо-блэгъу щыкIуагъ.
Къыблэ-КъохьэпIэ, Донской фронтхэм ядзэхэм шэкIогъум и 19-м, Сталинград фронтым идзэхэм шэкIогъум и 20-м топ мин 13,5-кIэ, ракетнэ артиллерием иустановкэ 1250-кIэ пыим утынышхо рахыгъ. Советскэ Союзымрэ фашист Германиемрэ лъэшэу зыщызэпэуцужьыгъэхэ Сталинград заор джарэущтэу егъэжьагъэ хъугъэ. Советскэ артиллерием мы заом мэхьанэшхо щыриIагъ. Сталинград дэжь щызэогъэ артиллеристхэм топыщэ миллион 13-м ехъу пыим тырапхъанкIи, ипытапIэхэр пхыратхъугъэх ыкIи ащ идзэшхо зэхакъутагъ.
Заом илъэхъан Апшъэрэ Главнокомандованием ирезерв иартиллерийскэ корпус 11, иартиллерийскэ дивизии 110-рэ, артиллерийскэ, противотанковэ бригадабэ зэхащэгъагъ. ЗэонымкIэ артиллеристхэм опытэу Сталинград дэжь щыряIэ хъугъэр Хэгъэгу зэошхом илъэхъан нэмыкI операциехэу зэхащагъэхэми къащашъхьэпэжьыгъэх. Артиллерием ыкIуачIэ сыдигъуи къэзыгъэлъэшыщтыгъэхэр ащ пэщэныгъэ дызезыхьагъэхэмрэ артиллерийскэ Iашэхэр зышIыщтыгъэхэмрэ ары. АртиллериемкIэ дзэ пэщэ цIэрыIохэу артиллерием имаршал шъхьаIэу, Апшъэрэ Главнокомандующэм игуадзэу Н. Н. Вороновым, артиллерием имаршал шъхьаIэу М. И. Неделиным, артиллерием имаршал- хэу В. И. Казаковым, Г. А. Одинцовым, Г. Е. Передельскэм, В. М. Михалкиным ацIэ непэ тигуапэу къетэIо.
Джащ фэдэу артиллерие IашэхэмкIэ конструктор цIэрыIоу В. И. Грабиным, Социалистическэ IофшIакIэм тIогъогогъу и ЛIыхъужъэу, техническэ дзэхэмкIэ генерал-полковникэу, Сталиным ишIухьафтынхэм ялауреатэу, артиллерие шIэныгъэхэмкIэ Академием идействительнэ членэу, Краснодар краим истаницэу Старонижестеблиевскэм къыщыхъугъэу, Советскэ Союзым имаршалэу Л. А. Говоровым щытхъур къалэжьыгъ.
Хэгъэгу зэошхом илъэхъан артиллерист 1800-м ехъумэ Советскэ Союзым и ЛIыхъужъыцIэ къафаусыгъ. ТичIыпIэгъухэу рядовойхэу Ацумыжъ Айдэмыр Ахьмэд ыкъор, Шумаков Георгий Евгений ыкъор, Топорков Андрей Дмитрий ыкъор, Стариковский Александр Степан ыкъор, Сапунов Николай Андрей ыкъор, Донских Иван Григорий ыкъор, Гизатуллин Хамазан Гатаул ыкъор, Бжыхьэкъо Къымчэрый Борэкъо ыкъор ахэм ащыщых.
Кардашов Василий Алексей ыкъом, Бугримов Исидор Савелий ыкъом, Агиенко Василий Матвей ыкъом Щытхъум иорденищ къафагъэшъошагъ.
Хэгъэгу зэошхом хэлэжьагъэхэу полковникхэу Синюгин Петр Василий ыкъом, Богомолов Михаил Андрей ыкъом, Смирнов Геннадий Иван ыкъом, Ермоленко Иван Яков ыкъом, Нугманов Рауль Закий ыкъом, рядовойхэу Белоус Семен Авксентий ыкъом, Наджэкъо Алджэрый Аслъанчэрые ыкъом, Жмак Павел Иван ыкъом ыкIи нэмыкIыбэмэ хэгъэгум итын лъапIэхэр – орденхэмрэ медальхэмрэ къафагъэшъошагъэх.
СССР-м и Апшъэрэ Совет и Президиум 1944-рэ илъэсым чъэпыогъум и 21-м Указ ыштагъ артиллерием и Мафэ илъэс къэс агъэмэфыкIызэ ашIынэу. 1964-рэ илъэсым къыщегъэжьагъэу ракетыдзэхэмрэ артиллериемрэ я Мафэу ар хагъэунэфыкIы.
Джыдэдэм Адыгеим щыпсэухэу, полковникхэу, Iэшэ зэIуупIэныгъэхэм ахэлэжьагъэхэу Фефелов Владимир Владимир ыкъом, Волосецкий Роман Петр ыкъом, Сычев Иван Николай ыкъом, Кириченко Николай Василий ыкъом, Воротило Валерий Григорий ыкъом, подполковникхэу, Iэшэ зэIуупIэныгъэхэм ахэлэжьагъэхэу Праздников Сергей Василий ыкъом, Джунь Андрей Владимир ыкъом, Суралев Михаил Вячеслав ыкъом, Габрусь Александр Евгений ыкъом, Е. А. Стоценкэм, Мамедов Роберт Наджаф-Оглы ыкъом, Басиев Алексей Владимир ыкъом тихэгъэгу и УIэшыгъэ КIуачIэхэм ягъэпытэн яIахьышIу хашIыхьэ.
Полковникэу Чыназыр Аслъан Исмахьилэ ыкъом, подполковникхэу Челенгаров Борис Сергей ыкъом, Шкарбан Виктор Иван ыкъом ядунай зэрахъожьыгъэр лъэшэу гухэкI.
Адыгеир сыдигъуи артиллериемкIэ командир дэгъухэр зыщагъасэхэрэ чIыпIэу щытыгъ. Я 47-рэ ракетэ бригадэм, я 9-рэ мотошхончэо дивизием, я 131-рэ мотошхончэо бригадэм яракетыдзэхэмрэ яартиллериерэ илъэсыбэрэ мыщ итыгъэх. Я 227-рэ Таллинскэ артиллеристскэ бригадэр джыдэдэм хэушъхьафыкIыгъэ дзэ операцием хэлажьэ. Адыгеим щызэхэщэгъэ дивизионитIумэ – топ-гаубицэхэу Д-20 зыфиIохэрэм ядивизионэу Советскэ Союзым и ЛIыхъужъэу Андырхъое Хъусен ыцIэ зыхьырэмрэ реактивнэ дивизионэу «Ураган» зыфиIорэмрэ сыд фэдэрэ лъэхъани нахьыжъхэм щысэ атырахы, ахэм ягъэхъагъэхэм ахагъахъо.
Джырэ шапхъэхэм адиштэрэ ракетэ комплексхэу «Эскандер», «Эскандер-М», реактивнэ системэхэу «Торнадо С», «Торнадо Г», гаубицэхэу «Коалиция» зыфиIохэрэр непэ Урысыем и УIэшыгъэ КIуачIэхэм жъугъэу ащагъэфедэх.
IэпэIэсэныгъэшхоу ахэлъым, Iэшэ лъэпкъыкIэхэр гъэхъагъэ хэлъэу къызэрэзфагъэфедэхэрэм яшIуагъэкIэ ракетыдзэхэмрэ артиллериемрэ япшъэрылъхэр дэгъоу непи агъэцакIэх, Урысыем ифедэхэр дэгъоу къагъэгъунэ.
Ракетчикхэмрэ артиллеристхэмрэ ямэфэкIкIэ сафэгушIо!
КЪУАДЖЭ Аслъан.
УIэшыгъэ КIуачIэхэм яветеран, Iэшэ зэIуупIэныгъэхэм ахэлэжьагъ, отставкэм щыIэ полковник.