Муниципальнэ образованиеу «Къалэу Мыекъуапэ» иадминистрацие ипащэ дэжь щызэхэщэгъэ терроризмэм пэшIуекIогъэнымкIэ комиссиемрэ лъэпкъ ыкIи дин зэфыщытыкIэхэм яIофыгъохэмкIэ УпчIэжьэгъу советымрэ зичэзыу зэхэсыгъо яIагъ.
Ащ хэлэжьагъэх ыпшъэкIэ зигугъу къэтшIыгъэ комиссием ыкIи советым хэтхэр, хэбзэухъумэкIо къулыкъухэм, общественнэ организациехэм ялIыкIохэр, динлэжьхэр.
Iофтхьабзэр зэрищагъ къэлэ администрацием ипащэу Геннадий Митрофановым.
— Непэрэ зэхэсыгъом тызыщытегущыIэщтыр зы Iофыгъу нахь мышIэми, ащ мэхьанэшхо иI. Лъэпкъ ыкIи дин зэгурыIоныгъэр гъэпытэгъэнымкIэ, экстремизмэ нэшанэ зыхэлъ хэбзэукъоныгъэхэм тиныбжьыкIэхэр ащытыухъумэнхэмкIэ анахьэу тынаIэ зытетын фэе лъэныкъохэр, шIыкIэхэр дгъэнэфэнхэр ары. Общественнэ, лъэпкъ ыкIи культурнэ организациехэу къалэм дэтхэр мыщ епхыгъэ IофшIэным чанэу къыхэлажьэх, — хигъэунэфыкIыгъ Геннадий Митрофановым.
АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет ипащэу Шъхьэлэхъо Аскэр къытегущыIагъ лъэпкъ зэгурымыIоныгъэм ыкIи экстремизмэм апэуцужьыгъэнымкIэ анахьэу анаIэ зытырагъэтырэ лъэныкъохэм. ХэушъхьафыкIыгъэ дзэ операциер зыщыкIорэ лъэхъаным ыкIи непэ дунаим щызэрахьэрэ политикэм япхыгъэу ащ мэхьанэшхо къыхигъэщыгъ.
Джащ фэдэу къэралыгъо политикэм къыгъэуцурэ пшъэрылъ шъхьаIэхэм япхырыщын лъэпкъ ыкIи дин объединениехэр къыхэгъэлэжьэгъэнхэм, ныбжьыкIэхэм яхэгъэгу шIу алъэгъоу пIугъэнхэм, къалэм иобщественнэ ыкIи икультурнэ щыIакIэ хэщэгъэнхэм анаIэ нахь тырагъэтын фаеу Шъхьэлэхъо Аскэр ылъытагъ.
— Республикэм общественнэ-политическэ зыпкъитыныгъэ илъ нахь мышIэми, Украинэм щыкIорэ хэушъхьафыкIыгъэ дзэ операцием, лъэпкъ ыкIи дин зэгурымыIоныгъэм къыхэкIэу КъокIыпIэ Благъэм къыщытэджыгъэ бырсырхэм адырагъаштэу аIозэ партиехэр, движениехэр зэкъохьанхэшъ, е цIыф гъэнэфагъэхэм ягукъэкIыкIэ пикетхэр зэхащэнхэ алъэкIыщт. Ахэм япхыгъэ къэбар нэпцIхэу Интернет хъытыухэм къарыхьэхэрэм талъэплъэ, игъом къыхэтэгъэщых, — къыIуагъ Комитетым итхьаматэ.
КъокIыпIэ Благъэм щыхъурэ-щышIэрэм епхыгъэу зэIукIэгъум хэлажьэхэрэм ащ закъыфигъэзагъ ыкIи зэпэуцужьыр мамырэу зэшIохыгъэнымкIэ акъылыгъэ зыхэмылъ зекIуакIэхэр зэрамыхьанхэм, сыд фэдэрэ лъэныкъуи дырамыгъэштэным къыфэджагъ.
Экстремизмэм ылъэныкъокIэ къэбар нэпцIхэр зыгъэIухэрэм якъыхэгъэщынкIэ зэрахьэрэ Iофтхьабзэхэм къатегущыIагъ АР-м хэгъэгу кIоцI IофхэмкIэ и Министерствэ экстремизмэм пэшIуекIогъэнымкIэ и Гупчэ иотдел ипащэу ГутIэ Рэмэзан. Ащ къызэриIуагъэмкIэ, мыр Iофыгъо шъхьаIэхэм ащыщ ыкIи бэхэм дунэе хъытыур къызэрэзыфагъэфедэрэм фэшI якъыхэгъэщын гумэкIыгъо къыпэкIы.
— Арэущтэу щытми, мы лъэныкъом епхыгъэу тишъолъыр бзэджэшIагъэ щызезыхьагъэхэм ащыщхэр къыхэдгъэщынхэ тлъэкIыгъ, ащыщхэри IэкIыб къэралыгъохэм арыкIыжьыгъэх. Дунаим щыхъурэм дырагъаштэзэ пэшIорыгъэшъ Iофтхьабзэхэр тишъолъыр щызэхамыщэнхэм тынаIэ тет. АщкIэ общественнэ ыкIи дин организациехэм зэпхыныгъэ адытиIэу тызэдэлажьэ, — къыIуагъ ГутIэ Рэмэзан.
Мыекъопэ къэлэ администрацием щыкIогъэ зэхэсыгъом динлэжьхэр, общественнэ IофышIэхэр къыщыгущыIагъэх, яеплъыкIэхэр къыщыраIотыкIыгъэх. Студентхэм еплъыкIэ тэрэз яIэным, лъэпкъ ыкIи дин зэмызэгъыныгъэхэр къахэмыфэнхэм афэIорышIэщт амалхэр, анахьэу анаIэ зытырагъэтыщт лъэныкъохэр зэдагъэнэфагъэх.
Iэшъынэ Сусан.
Сурэтхэр: А. Балабась.