Гъогухэм атехъухьэрэ хъугъэ-шIагъэхэм ахэкIуадэхэрэм я Дунэе шIэжь мафэ къыдыхэлъытагъэу Мыекъопэ политехническэ колледжым зэIукIэ щыкIуагъ.
Ащ хэлэжьагъэх АР-м и Къэралыгъо автоинспекцие иIофышIэхэр, динлэжьхэр ыкIи медицинэ катастрофэмкIэ Адыгэ республикэ гупчэм илIыкIохэр, студентхэр.
НыбжьыкIэхэр зыхэфэрэ гъогу хъугъэ-шIагъэхэм япчъагъэ нахь макIэ шIыгъэным анаIэ тырарагъэдзэным фэIорышIагъ мы Iофтхьабзэр.
ГъогурыкIоным ишапхъэхэр зыукъохэрэм тхьамыкIагъоу къяхъулIэн ылъэкIыщтыр нэрылъэгъу къафэзышIырэ сурэттехыгъэхэм якъэгъэлъэгъонэу полицейскэхэм къагъэхьазырыгъэмкIэ зэIукIэр къызэIуахыгъ.
Нэужым къэзэрэугъоигъэхэм закъыфагъэзагъ АР-м и Къэралыгъо автоинспекцие гъогу-патруль къулыкъумкIэ иотдел ипащэу Алексей Чмыревым ыкIи ащ иотделэу Мыекъуапэ щыIэм ипащэу Виталий Загайко. Тишъолъыр игъогухэм къатехъухьэрэ авариехэм ахэр къытегущыIагъэх. ХэбзэухъумакIохэм къызэрэхагъэщыгъэмкIэ, я 8-рэ гъогу хъугъэ-шIагъэ пэпчъ илъэс 17 — 23-рэ зыныбжьхэм ялажьэ хэлъ.
Гъогу хъугъэ-шIагъэхэр къызыхэкIырэ ушъхьагъухэр къизыIотыкIырэ видеороликхэр студентхэм къафагъэлъэгъуагъэх. Ахэм къыздахьырэ тхьамыкIагъохэр шъхьэихыгъэу нэрылъэгъу къафашIыгъ.
ГъогурыкIоным хэлэжьэрэ пстэуми щэIагъэ, сакъныгъэ къызхагъэфэным, шъхьэкIафэ зэфыряIэным динлэжьхэр къыфэджагъэх. Ешъуагъэу рулым IумытIысхьанхэу, псынкIэу мызекIонхэу ныбжьыкIэхэм закъыфагъэзагъ.
Медицинэ катастрофэмкIэ гупчэм иIофышIэхэм апэрэ медицинэ IэпыIэгъур къин хэфагъэхэм зэрэрагъэгъотыщт шIыкIэхэр къащарагъэлъэгъугъ.
«ШIэжьым идэпкъ» зыфиIорэ едзыгъор Iофтхьабзэм икIэух хъугъэ. Гъогу хъугъэ-шIагъэхэм зигупсэ хэкIодагъэхэм агу къыдэзыщэещт гущыIэ фабэхэр шIоигъоныгъэ зиIэ пстэуми хэушъхьафыкIыгъэ стендым тыратхэн амал яIагъ.
Iэшъынэ Сусан.