Мыекъуапэ щыпсэурэ Саша Лапшовым хэушъхьафыкIыгъэ дзэ операцием хэлэжьэрэ дзэкIолIхэм афитIупщыгъэ шIушIэ IэпыIэгъур, гущыIэ фабэхэр зэрытхэгъэ письмэр аIукIагъэх.Адыгеим икъэзэкъ ныбжьыкIэхэм я Союз шIушIэ IэпыIэгъу зэриугъоирэр кIэлэеджакIом зызэхехым, ахэм зафигъэзагъ. Союзым итхьаматэу Екатерина Загорулько кIэлэ ныбжьыкIэр къыгъэгугъагъ дзэкIолIхэм шIушIэ IэпыIэгъур зэраритыжьырэм видео къыфытырихынэу.
ШэкIогъум икъихьагъум Мыекъопэ къэзэкъ отделым зичэзыу шIушIэ IэпыIэгъоу Херсон лъэныкъом щыIэ я 227-рэ Мыекъопэ артиллерийскэ бригадэм афищагъэм Сашэ афигъэхьазырыгъэ IэшIу-IушIу къэмланхэри хэлъыгъэх. Видеоу тырахыгъэм къыщеIо тидзэкIолIхэр ащ лъэшэу зэрэщыгушIукIыгъэхэр. КIэлэеджакIом ытхыгъэ письмэм зэкIэми зэхахэу къеджагъ водитель-механикэу «ПсихкIэ» заджэхэрэр. Зыгъэпсэфыгъом ар къызыкIокIэ Сашэ зыIуигъэкIэнышъ дзэкIолIхэм ацIэкIэ «тхьауегъэпсэу» зэрэриIощтыр къыхигъэщыгъ.
— Сигуапэ сэлам фабэу дзэкIолIхэм афысагъэхьыгъэр зэраIузгъэкIэн слъэкIыгъэр. Ащ фэдэ лъэбэкъоу патриот ныбжьыкIэм ышIыгъэм урыгушхонэу щыт, — къыIуагъ Екатерина Загорулько.
Шъугу къэдгъэкIыжьын, Мыекъуапэ игурыт еджапIэу N15-м ия 6-рэ класс щеджэрэ Александр Лапшовым къызыхъугъэ мафэмкIэ шIухьафтынэу къыратыгъэ ахъщэм къыхьырэ IэшIу-IушIухэр къыщэфыхи, хэушъхьафыкIыгъэ дзэ операцием хэлажьэхэрэм зэрэфаригъэщагъэр тигъэзет къыхиутыгъагъ. Къэмлани 5-м адэфэрэ IэшIу-IушIухэм гущыIэ фабэу дзэкIолIхэм афигъэхьыхэрэр зэрытхэгъэ письмэр ягъусагъ. Ащ фэдэ шIушIэныр мы кIэлэ губзыгъэм апэрэп къызэрэхафэрэр. ЗэуапIэм Iутхэу тирэхьатныгъэ къэзыухъумэхэрэм IэшIу-IушIухэр зашхыхэкIэ нахь агу къыдищэещтэу Сашэ ылъытагъ.
Iэшъынэ Сусан.