Урысыем икъэралыгъо фондэу «Хэгъэгум иухъумакIохэр» зыфиIорэм ишъолъыр къутамэ лъэпкъ зыкIыныгъэм и Мафэ ипэгъокIэу проектэу «ЛIыхъужъэу къэхъухэрэп» зыфиIорэр ытIупщыгъ.
Ащ пшъэрылъ шъхьаIэу иIэр патриотическэ IофшIэныр зэпымыоу ныбжьыкIэхэм адызехьэгъэным изэхэщэн ары. Проектым илъэныкъо шъхьаIэхэм ащыщ «лIыхъужъныгъэм иурокхэр». ТидзэкIолIхэм гурыт ыкIи апшъэрэ еджапIэхэр, колледжхэр къакIухьэх, зэдэгущыIэгъухэр адашIых. Мэзэ зэкIэлъыкIохэм ащ фэдэ Iофтхьабзэхэм Iэтэхъо ыкIи ныбжьыкIэ 1000 фэдиз ахэлэжьагъ.
Проектым имурад шъхьаIэр — Урысыем ыкIи ар къэзыухъумэхэрэм тарыгушхоным, обществэ зыкI гъэпсыгъэным, патриотизмэр ыкIи гражданственностыр гъэпытэгъэнхэм афэшI Адыгэ Республикэм щыпсэухэрэм, къыткIэхъухьэрэ лIэужхэри ахэтхэу, патриотическэ ыкIи пIуныгъэ IофшIэныр зэпымыоу адызехьэгъэныр, Хэгъэгум иухъумакIохэу, хэушъхьафыкIыгъэ дзэ операцием хэлэжьагъэхэу зыпсэ зыгъэтIылъыгъэхэм яшIэжь гъэлъэпIэгъэныр.
Проектым ипхырыщын хэлажьэх шъолъыр фондэу «Хэгъэгум иухъумакIохэр», гъэцэкIэкIо хэбзэ къулыкъухэр, Адыгэ республикэ общественнэ организациеу «ХэушъхьафыкIыгъэ дзэ операцием иветеранхэм я Ассоциацие», Хэгъэгум идзэкIолIхэм яунагъохэм я Комитет, гъэсэныгъэ учреждениехэм якIэлэегъаджэхэр ыкIи якIэлэеджакIохэр, гурыт ыкIи апшъэрэ гъэсэныгъэ зыщызэрагъэгъотырэ еджапIэхэм ястудентхэр, къэбар жъугъэм иамалхэр, тхылъеджапIэхэр, мысатыу общественнэ организациехэр, гуфакIохэр, волонтерхэр.
Къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ проектэу «ЛIыхъужъэу къэхъухэрэп» зыцIэм гъэсэныгъэм иучреждениехэр хэлэжьэнхэу регъэблагъэх. Тарихъ ыкIи мэхьанэ зиIэ мэфэкIхэу хагъэунэфыкIыхэрэм афэгъэхьыгъэу «ЛIыхъужъныгъэм иурокхэр» шъолъыр фондым афызэхищэщтых, ахэм хэушъхьафыкIыгъэ дзэ операцием иветеранхэр къарагъэблэгъэщтых. ЕджапIэ пэпчъ ветеран фагъэнэфэщт.
Апшъэрэ ыкIи гурыт гъэсэныгъэ языгъэгъотырэ еджапIэхэм язэIукIэгъухэм арагъэблэгъэщтхэр хэушъхьафыкIыгъэ дзэ операцием иветеранхэу илъэс 18 —35-рэ зыныбжьхэу общественнэ ыкIи проект IофшIэнымкIэ IэпэIэсэныгъэ зиIэхэр ары. Ащ ишIуагъэкIэ зы лIэшIэгъу къыхэхъухьагъэхэм язэдэлэжьэныгъэ ыкIи язэгурыIоныгъэ гъэпытагъэ хъущт.
КIэлэцIыкIухэм ыкIи ныбжьыкIэхэм Iоф адэшIэгъэнымкIэ егъэджэн семинархэу урысые шапхъэм диштэу зэхащэхэрэм хэушъхьафыкIыгъэ дзэ операцием иветеранхэр кIонхэмкIэ шъолъыр фондыр IэпыIэгъу афэхъу.
«Хэгъэгум иухъумакIохэр» зыфиIорэ шъолъыр фондым республикэм ит гъэсэныгъэ учреждениехэр проектым хэлэжьэнхэу регъэблагъэх. 2023-рэ илъэсым шэкIогъум и 13-м къыщегъэжьагъэу и 30-м нэс лъэIу тхылъ атын алъэкIыщт. Проектэу «ЛIыхъужъэу къэхъухэрэп» зыфиIорэм ипхырыщын къыдыхэлъытэгъэ Iофтхьабзэхэр 2024-рэ илъэсым ищылэ мазэ и 10-м къыщегъэжьагъэу тыгъэгъазэм и 20-м нэс рагъэкIокIыщтых.
Iэшъынэ Сусан.