АР-м и ЛIышъхьэу КъумпIыл Муратрэ коммерческэ банкэу «Кубань Кредит» зыфиIорэм илъыплъэкIо совет итхьаматэу Виктор Бударинымрэ АР-м и Правительствэ и Унэ IофшIэгъу зэIукIэгъу тыгъуасэ щызэдыряIагъ. Адыгеим щырахъухьэгъэгъэ проектхэм япхырыщын къыдыхэлъытагъэу язэдэлэжьэныгъэ джыри нахь зегъэушъомбгъугъэнымкIэ амалэу щыIэхэм ахэр атегущыIагъэх.
Мы Iофтхьабзэм хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, АР-м иминистрэхэм я Кабинет и Тхьаматэу КIэрэщэ Анзаур, АР-м иминистрэхэм я Кабинет и Тхьаматэ игуадзэу ЛIыхэсэ Махьмуд, АР-м экономикэ хэхъоныгъэмкIэ ыкIи сатыумкIэ иминистрэу Шэуджэн Заур, Мыекъуапэ имэрэу Геннадий Митрофановыр, коммерческэ банкэу «Кубань Кредитым» игъэIорышIапIэ итхьаматэу Александр Калинич, банкым и Предгорнэ шъолъыр дирекцие ипащэу ХьацIэцIэ Мурат.
ЗэIукIэгъум иублэгъум АР-м и ЛIышъхьэ коммерческэ банкэу «Кубань Кредит» зыфиIорэм ипащэхэм афэгушIуагъ банкыр зызэхащагъэр илъэс 30 зэрэхъугъэм фэшI. Ащ къызэрэхигъэщыгъэмкIэ, Виктор Будариным пэщэныгъэ зыдызэрихьэрэ компаниехэм бэшIагъэу шIуагъэ къэзытырэ зэдэлэжьэныгъэ зэдыряI, Адыгеим иэкономикэ ихэхъоныгъэ ежь ышъхьэкIэ В. Будариныр къызэрэхэлажьэрэм пае зэрэфэразэр къыIуагъ ыкIи республикэм иапшъэрэ тын фигъэшъошагъ.
Адыгэ Республикэм ыпашъхьэ гъэхъэгъэ ин дэдэхэр зэрэщыриIэхэм пае Виктор Будариным медалэу «Адыгеим и Щытхъузехь» зыфиIорэр ащ ритыжьыгъ. Джащ фэдэу экономикэм ылъэныкъокIэ гъэхъагъэу ышIыгъэхэм апае щытхъуцIэу «АР-м изаслуженнэ экономист» зыфиIорэр Александр Калинич фигъэшъошагъ. Экономикэмрэ финансхэмрэ алъэныкъокIэ гъэхъагъэу ышIыгъэхэм апае ХьацIэцIэ Мурат Рэзэныгъэ тхылъ ритыгъ.
Адыгеим и ЛIышъхьэ къызэрэхигъэщыгъэмкIэ, цIыфхэм джырэ уахътэм диштэрэ банк фэIо-фашIэхэр зэраIэкIагъахьэхэрэр нахьышIу шIыгъэным пае финанс организациехэм адыриIэ зэдэлэжьэныгъэр лъигъэкIотэным республикэм ифедэ хэлъ. Анахьэу КъумпIыл Мурат анаIэ зытыраригъэдзагъэр бизнесыр социальнэ лъэныкъом нахь фэгъэзэгъэныр ары. ГущыIэм пае, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Кубань Кредит» зыфиIорэмрэ зэфэшIыгъэ Iахьзэхэлъ обществэу «ОБД-мрэ» язэдэлэжьэныгъэ ишIуагъэкIэ кIэлэцIыкIу ибэхэм апае Мыекъуапэ унэ щагъэпсыгъ, цIыфхэр зычIэсыщтхэ фэтэрыбэу зэхэт уних, инженер инфраструктурэм къыхиубытэрэ псэуалъэхэр ашIыгъэх. Мыекъуапэ имикрорайонхэм ащыщ горэм фэтэрыбэу зэхэт унэхэр щашIыщтых, чIыпIэхэм яхэхъоныгъэкIэ программэу зэхагъэуцуагъэм къыдыхэлъытагъэу ар щыт.
«Коммерческэ банкэу «Кубань Кредитым», зэфэшIыгъэ Iахьзэхэлъ обществэу «ОБД-м» тырягъусэу зэшIотхырэ IофшIэн лъэпкъ зэфэшъхьафхэм бэ къызэлъаубытырэр. Мы аужырэ лъэхъаным инвестициехэр нахьыбэ хъугъэх, проектыкIэхэр зэшIотэхых. Ащ фэдэ зэдэлэжьэныгъэм игъэпытэн тишъолъырхэм шIуагъэ къызэрафихьырэр тинэрылъэгъу, Адыгеимрэ Краснодар краимрэ азыфагу илъ гъунэгъушIу зэфыщытыкIэхэр джыри нахь пытэнхэмкIи гугъапIэхэр ащ къетых. Iофэу зэдэдгъэцакIэрэм тэркIэ мэхьэнэ гъэнэфагъэ иIэу щыт. Сыда пIомэ экономикэм зыкъыIэтынымкIи, тицIыфхэм ящыIакIэ нахьышIу шIыгъэнымкIи а пстэуми яшIуагъэ къэкIо. Джащ пае тизэдэлэжьэныгъэ зедгъэушъомбгъущт, социальнэ лъэныкъом фытегъэпсыхьэгъэ бизнесым ишIуагъэ къэкIо Адыгеим социальнэ- экономикэ хэхъоныгъэ ышIынымкIэ ыкIи шъолъырыкIэхэр зыпкъ игъэуцожьыгъэнхэмкIэ», — къыIуагъ КъумпIыл Мурат.
АР-м и ЛIышъхьэ Виктор Будариным Iофэу ышIэрэм осэшхо къызэрэфишIыгъэм ыкIи бизнес-проектхэр пхырыщыгъэнхэмкIэ республикэм амал дэгъухэр зэращарагъэгъотыхэрэм апае зэрафэразэр къыхигъэщыгъ. А. Будариным къызэриIуагъэмкIэ, пэщэныгъэ ежь зыдызэрихьэрэ компаниехэр шъолъыр программэхэм, проектхэм ахэлэжьэнхэм фэхьазырых. Республикэм инвестициехэр нахьыбэу къихьанхэмкIэ, финанс фэIо-фашIэхэр нахьышIоу зэшIохыгъэнхэмкIэ ахэм амал дэгъухэр къатых.
Мы илъэсым банкэу «Кубань Кредит» зыфиIорэр зызэхащагъэр илъэс 30 зэрэхъурэр хигъэунэфыкIыгъ. Апэрэ мафэм къыщегъэжьагъэу ащ ынаIэ зытыригъэтыгъэр фэIо-фашIэхэр цыхьэшIэгъоу щытынхэр ары, финанс организациехэм яIофшIэн дэгъоу кIэкIынымкIи ащ мэхьанэшхо иI.
Банкым къепхыгъэхэу офиси 100-м ехъу, банкомат ыкIи терминал 500-м ехъу Урысые Федерацием ишъолъыри 5-мэ ащыриI: Краснодар краим, Адыгэ Республикэм, Ростов хэкум, Ставрополь краим ыкIи Москва.
АР-м и ЛIышъхьэ ипресс-къулыкъу