Илъэс къэс гъогухэм атехъухьэрэ хъугъэ-шIагъэхэм ахэкIуадэхэрэм я Дунэе шIэжь мафэу шэкIогъум иящэнэрэ тхьаумафэ хагъэунэфыкIы. Мыгъэ ар шэкIогъум и 19-м тефагъ.
Ащ къыдыхэлъытагъэу, Урысыем ишъолъырхэм Iофтхьэбзэ зэфэшъхьафхэр ащырагъэкIокIыщтых. Ар УФ-м хэгъэгу кIоцI IофхэмкIэ и Министерствэ гъогурыкIоныр щынэгъончъэнымкIэ и Къэралыгъо автоинспекцие къыщаIуагъ.
АР-м и Къэралыгъо автоинспекцие илъэс къэс мы мафэр инэплъэгъу ригъэкIырэп. Адыгеим ирайонхэми ащ фэгъэхьыгъэ Iофтхьабзэхэр ащыкIощтых. Ахэр гъогурыкIоным хэлажьэхэрэм ящыIэныгъэ ыкIи япсауныгъэ къэухъумэгъэнхэм иIофыгъохэм общественностым ынаIэ тыридзэным фэIорышIэщтых. Гъогу инспекторхэм Iофтхьабзэхэр зэхащэнхэмкIэ IэпыIэгъу къафэхъущтых хэбзэ къулыкъухэм ыкIи общественнэ организациехэм ялIыкIохэр. Джащ фэдэу кIэлэеджакIохэр, ныбжьыкIэхэр, къэбар жъугъэм иамалхэр къырагъэблэгъэщтых.
Машинэ зэутэкIхэм зицIыф хэкIодагъэхэм мы мафэр ягухэкIышху, ахэм афэшъыгъох, яшIэжь агъэлъапIэ, нэмыкIхэми сакъыныгъэ къахэфэным къыфэджэх. ХэткIи шъэфэп илъэс къэс зэрэдунаеу гъогу хъугъэ-шIагъэхэм нэбгырэ минишъэ пчъагъэ зэрахэкIуадэрэр, ащ нахьыбэжь сэкъатэу къызэрэнэрэр.
Агъэнэфэгъэ Iофтхьабзэхэм ащыщых авариехэм ахэкIодагъэхэм такъикърэ афэшъыгъоныр, гузэжъогъу къулыкъухэр ыкIи машинэ къутагъэхэр зыхэтыщтхэ автопробегхэр, гъогу хъугъэ-шIагъэхэм ахэфэгъэ кIэлэцIыкIухэу сымэджэщхэм ачIэлъхэм инспекторхэр алъыплъэнхэр, лъыр атыныр, нэмыкIхэри. Динлэжьхэр Тхьэм елъэIущтых, сакъыныгъэ гъогум къызщыхагъэфэным къыфэджэщтых.
Гъогу хъугъэ-шIагъэхэм ахэкIодагъэхэм я Дунэе шIэжь мафэ фэгъэхьыгъэ тхыгъэхэр джыри къыхэтыутыщтых.
Iэшъынэ Сусан.