ЗэлъашIэрэ шIэныгъэлэжьхэу Ацумыжъ Казбекрэ Иван Бормотовымрэ зэдатхыгъэ тхылъэу «Им в боях родными стали горы» зыфиIорэм иятIонэрэ къыдэкIыгъо осэшхо къыфашIыгъ.
Дунэе общественнэ организациеу «КIэлэцIыкIу-ныбжьыкIэ зекIонымкIэ ыкIи краеведениемкIэ Дунэе академие Остапец-Свешниковым ыцIэ зыхьырэр» зыфиIорэм и Президиум ыкIи Дунэе зэнэкъокъум ижюри къафэгушIох «2023-рэ илъэсым идышъэ компас» зыцIэ зэнэкъокъум и Дипломэу а 1-рэ шъуашэ зиIэр къызыфэгъэшъошэгъэхэ Ацумыжъ Казбек ГъучIыпсэ ыкъом — тарихъ шIэныгъэхэмкIэ докторым, «ШIэныгъ» зыфиIорэ организацием и Адыгэ къутамэ итхьаматэ, гуманитар ушэтынхэмкIэ Адыгэ республикэ институтэу КIэрэщэ Тембот ыцIэ зыхьырэм инаучнэ IофышIэ шъхьаIэ, тарихъымкIэ отделым ипащэ ыкIи Бормотов Иван Василий ыкъом — педагогикэ шIэныгъэхэмкIэ кандидатым, Пшызэ изаслуженнэ кIэлэегъаджэ, дзэ-тарихъ шIэныгъэхэмкIэ Урысые Академием ичлен-корреспондентым, тхакIом, краеведым.
Автормэ аугъоигъэ хъарзынэщ къэбархэр зыдэхьэгъэ тхылъыр 1942 — 1943-рэ илъэсхэм Адыгеим зэрэщызэуагъэхэм, Мыекъопэ районым ит «Партизан лъэс гъогум», партизанхэр зыщызэогъэхэ чIыпIэхэм, отрядэу «Лъэпкъ лъышIэжьхэм» къатегущыIэ.
Ацумыжъ Казбекрэ Иван Бормотовымрэ тыгу къыддеIэу тафэгушIо, джыри гъэхъэгъабэ ашIынэу, Адыгеим ищытхъу лъагэу аIэтынэу тафэлъаIо!