Кавказ биосфернэ заповедникым игъэмэфэ зекIо лъагъохэр зэфишIыжьыгъэх.
Ащ ипресс-къулыкъу къызэритырэмкIэ, зэIухыгъэу къэнагъэхэр илъэсым къыкIоцI зэпымыоу Iоф зышIэхэрэ анае-хэшъэе мэзыр, паркэу «Южные культуры», блэтIупщыпIэхэу «Лаура» ыкIи «Гъозэрыплъ» зыфиIохэрэр ары.
Ары нахь мышIэми, непэ зекIоныр Адыгеим щызэпыурэп. ДжырэкIэ бжыхьэ зекIоным игъу. Ащ кIымафэр къыкIэлъыкIощт. АР-м зекIонымкIэ и Комитет джыри зэфэхьысыжьхэр пшIынхэр жьыIоу елъытэ. Арэу щытми, мы илъэсым пыкIыгъэ уахътэм къыкIоцI хьакIэу тишъолъыр къихьагъэм ипчъагъэкIэ 2023-р гъэрекIорэм зэрэшъхьадэкIыщтым яцыхьэ телъ. Шъолъыр кIоцI зекIоным къэралыгъом зызэрэщиушъомбгъурэм ащкIэ ишIуагъэ къэкIо. Ащи изакъоп. Адыгеим мы лъэныкъомкIэ хэхъоныгъэшIухэр ешIых. Инфраструктурэр зэтырегъэпсыхьэ, хьакIэщхэм япчъагъэ хэхъуагъ, зекIоным ылъэныкъокIэ Iоф зышIэхэрэр нахьыбэ хъугъэх. Республикэм къихьэрэ хьакIэхэм япчъагъэ хэгъэхъогъэнымкIэ Iофтхьэбзэ инхэу адыгэ къуаем имэфэкI, хьалыжъом, къэбым, къужъым ямафэхэу зэхащэхэрэм яшIуагъэ къэкIо. ГущыIэм пае, адыгэ къуаем имэфэкIэу мыгъэ зэхащагъэм зекIо мин 36-м ехъу къыугъоигъ. Ыпэрэ илъэсхэм афэдэу зекIохэм янахьыбэр Ростов хэкум ыкIи Пшызэ шъолъыр къарэкIых, къэралыгъо гупчэм ичIыпIэхэм ащыщхэри жъугъэу къакIохэ хъугъэ.
ШIэхэу тыублэщт кIымэфэ зекIо лъэхъанми бэкIэ щэгугъых. БлэкIыгъэ илъэсым осыр зэрэмэкIагъэм къэгъэлъэгъонхэр къыригъэIыхыгъэхэми, мыгъэ нахьышIунэу мэгугъэх.