ГумкIэ Iэзэгъоу алъытэрэ биологическэ хэгъахъэу, ау Iэзэгъу уцэу щымыт препаратым фэгъэхьыгъэ къэбарэу рекламэкIэ къатырэр хэбзэгъэуцугъэм димыштэу щалъытагъ монополием пэшIуекIогъэнымкIэ федеральнэ къулыкъум и ГъэIорышIапIэу Адыгеим щыIэм. Мы къулыкъур а Iофым изэхэфын зыфежьэ нэуж а рекламэр нахьыбэрэ къатыжьыгъэп.
Московскэ хэкум щыщым тхьаусыхэ тхылъ монополием пэшIуекIорэ къулыкъум къыфигъэхьыгъагъ, Адыгеим ит компаниехэм ащыщ ыкIи къэралыгъо интернет-платформэ иным хэбзэгъэуцугъэр аукъоу а тхыгъэм къыщиIощтыгъ.
Монополием пэшIуекIогъэнымкIэ федеральнэ къулыкъум АР-мкIэ и ГъэIорышIапIэ агу къыгъэкIыжьыгъ: биологическэ хэгъахъохэм ягугъу къашIы хъумэ, ахэр Iэзэгъу уцэу зэрэщымытхэри къыдаIон фае.
Зэхэфынхэм зэфэхьысыжьэу афэхъугъэр: Адыгеим щылэжьэрэ компанием фэгъэхьыгъэ Iофэу къызэIуахыгъагъэр зэфашIыжьыгъ, ау интернет-платформэм иIофышIэу мы Iофым фэгъэзагъэм, рекламэм фэгъэхьыгъэ хэбзэгъэуцугъэр зэриукъуагъэм фэшI, административнэ пшъэдэкIыжь рагъэхьыщт.