Къэгъэлъэгъон-форумэу «Урысыер» зыфиIорэм къыдыхэлъытагъэу къалэу Москва Урысые къэгъэлъэгъонэу «Урысыем ипцIыикъ чъыгхэр» зыфиIорэр тыгъуасэ къыщызэIуахыгъ. ВДНХ-м ичъыгдэкI гъогу къэралыгъом ишъолъыр 90-мэ яелкэхэр тетых, апэ дэдэ итыр Адыгеим иер ары.
Адыгэмэ ялъэпкъ тхыпхъэхэу дышъэ IуданэкIэ хэдыкIыгъэхэм ар къагъэдахэ, джэгуалъэу пылъхэм ахэр апхырыщыгъэх, республикэм итамыгъэ шъхьаIэ, щэбзащэхэр къызщыгъэлъэгъогъэ пкъыгъохэри пылъагъэх.
ИлъэсыкIэ джэгуалъэхэр зыгъэхьазырыгъэхэр тилъэпкъ IэпэIасэхэу дышъэ хэдыкIыным фэкъулайхэр арых — Сетэ Сафиет, Гумэ Ларис, Мыгу Рузан, Джарымэкъо Зурет ыкIи Битэ Аз.
Шъугу къэдгъэкIыжьын, дунэе къэгъэлъэгъон-форумэу «Урысыер» зыфиIорэр Москва шэкIогъум и 4-м къыщыублагъэу щэкIо, къихьащт илъэсым имэлылъфэгъу мазэ и 12-м ар зэфашIыжьыщт. Урысыем ишъолъыр пстэуми гъэхъагъэу яIэхэр ащ къыщыгъэлъэгъуагъэх. ВДНХ-м Адыгеири къыщыгъэлъэгъуагъ, шIоигъоныгъэ зиIэ пстэури ыпкIэ хэмылъэу къэгъэлъэгъонхэм яплъынхэ алъэкIыщт. Тиреспубликэ инэпэеплъ я 75-рэ павильоным чIэт.