СамбэмкIэ зэIухыгъэ республикэ зэнэкъокъу псэупIэу Красногвардейскэм щыкIуагъ. Ар Къудаикъо Мурат ишIэжь фэгъэхьыгъагъ ыкIи Адыгеим икъалэхэм, ирайонхэм къарыкIыгъэ спортсменхэм зыщаушэтыгъ.
ЗэхэщакIохэм къызэрэхагъэщыгъэмкIэ, ныбжьыкIэхэм зэкIэми ухьазырыныгъэ дэгъу къагъэлъэгъуагъ. Килограмм пчъагъэу къащэчырэм елъытыгъэу ахэр купи 9-у гощыгъагъэх. Бысымхэм тIогъогогъо текIоныгъэр къыдахыгъ: Артем Белгарянрэ Рафик Мамедовымрэ. Мыекъопэ районым щыщ Игорь Кубиц дышъэ медаль къыфагъэшъошагъ. Ау чемпионхэр анахьыбэу къызхэкIыгъэхэр Адыгэкъалэрэ Теуцожь районымрэ яхэшыпыкIыгъэ командэхэр ары. ТекIоныгъэр къыдахыгъ СтIашъу Ислъам, ТхьалI Ислъам, Хъот СултIан, Хьатхъохъу Илай, Шъэумэн Бислъан ыкIи ЦунтIыжъ Алкъэс. Медальхэр къэзыхьыгъэхэм зэкIэми тафэгушIо, тапэкIи ягъэхъагъэхэм ахагъэхъонэу афэтэIо.