Анахь дэгъухэр къэнэфагъэх
Я VII-рэ Урысые литературнэ фестивалэу «ЛиФФт» зыфиIорэм икIэух зэфэхьысыжь чъэпыогъум и 22-м щегъэжьагъэу и 24-м нэс къалэу Казань щыкIуагъ.Ащ хэгъэгум ишъолъыр 46-мэ ялитератор анахь дэгъухэр хэлэжьагъэх. МэфэкI Iофтхьабзэр тIэкIу гъэкIэкIыгъагъэ, ау купкI ушъагъэ иIагъ. Шъолъырхэм ялIыкIохэм ялъэпкъ шъуашэхэр ащыгъхэу ащ хэлэжьагъэх, зэралъэкIэу зыкъагъэлъэгъуагъ. Татарстан илитературнэ объединениехэм лъэтегъэуцохэр яIагъэх, зэлъашIэрэ урыс авторхэм мастер-классхэр къатыгъэх, Iэнэ хъураехэр кIэлэцIыкIу литературэм иIофыгъохэмкIэ ыкIи къыдэгъэкIакIохэм зэпхыныгъэу адыряIэхэмкIэ зэхащагъэх.
Чъэпыогъум и 23-м, пчыхьэм, культурнэ Гупчэу А. С. Пушкиным ыцIэ зыхьырэм исценэ мэфэкI Iофтхьэбзэ инэу я VII-рэ Урысые литературнэ фестивалым илауреатхэр зыщагъэшIуагъэр щыкIуагъ. Зэнэкъокъум идышъэ лауреат хъугъэ Мария Карягинар, ар Чувашием щызэлъашIэрэ усакIу ыкIи драматург.
Литературнэ фестивалэу «ЛиФФт» итыжьын медаль къыдэзыхыгъэр тичIыпIэгъоу, Краснодар щыпсэурэ адыгэ усакIоу Шэуджэн Инвер. Зэнэкъокъум ижюри ащ илирическэ усэ куп осэшIу къыфашIыгъ, ахэр, мы аужырэ уахътэм инджылызыбзэкIэ, испаныбзэкIэ ыкIи сербыбзэкIэ зэрадзэкIыгъэх. ТекIоныгъэр къыдэзыхыгъэхэм къафэгушIуагъ ыкIи шIухьафтынэу къалэжьыгъэхэр къаритыжьыгъ Урысыем щыпсэурэ цIыф лъэпкъхэм я Ассамблее итхьамэтэгъоу Маргарита Аль.
Мыщ фэдэ зэнэкъокъу инхэм ятарихъкIэ, адыгэ тхакIор апэрэу лауреатхэм ащыщ хъугъэ. Фестивалэу «ЛиФФт-2024» зыфиIорэр Чувашием икъэлэ шъхьаIэу Чебоксары щызэхащэщт.
Дзэукъожь Нуриет.