«Культурэм ихэгъэхъон» зыфиIорэ къэралыгъо программэу Адыгэ Республикэм щыпхыращырэм къыдыхэлъытагъэу, культурэмкIэ Министерствэмрэ Лъэпкъ тхылъеджапIэмрэ республикэ зэнэкъокъоу «2023-м имуниципальнэ тхылъеджэпIэ анахь дэгъу» зыфиIорэр рагъэкIокIыгъ. Ащ мы илъэсым къоджэ тхылъеджэпIи 9 хэлэжьагъ.
Зэнэкъокъум пшъэрылъ шъхьаIэу иIагъэр тхылъеджапIэхэу Адыгеим итхэм яIофшIэн гъэлъэшыгъэныр, IофшIакIэм нахь фэIазэхэр къыхэгъэщыгъэнхэр, ащ елъытыгъэу анахь къоджэ тхылъеджэпIэ дэгъур АдыгеимкIэ гъэунэфыгъэныр ары.
Республикэ зэнэкъокъум зэфэхьысыжьхэр зыщыфашIыгъэ Iофтхьабзэр чъэпыогъум и 31-м Шэуджэн район гупчэ тхылъеджапIэм щыкIуагъ. Ащ хэлэжьагъэх Шэуджэн район администрацием ипащэ игуадзэу А. Жэмадыкъор, АР-м культурэмкIэ иминистрэ игуадзэу Кушъу Светланэ, культурэмкIэ Министерствэм иIофышIэу Ацумыжъ Лианэ, республикэм ичIыпIэ тхылъеджапIэхэм япащэхэр, яIофышIэхэр, журналистхэр.
Зэнэкъокъум изэфэхьысыжьхэмкIэ, щытхъуцIэу «2023-м имуниципальнэ тхылъеджэпIэ анахь дэгъу» зыфиIорэр фагъэшъошагъ Шэуджэн районым игупчэ тхылъеджапIэ (ипащэр Хьамыцу Зар Сэфэрбый ыпхъур). Ащ кIыгъугъ Дипломыр ыкIи сертификатэу сомэ мин 200 зэрылъыр.
Дипломхэр ыкIи къэгъагъэхэр зэкIэ зэнэкъокъум хэлэжьагъэхэм аратыгъэх:
— Теуцожь районым игупчэ тхылъеджапIэ ипащэу Бэрзэдж Ларисэ «Теуцожь районым илитературнэ картэ» ыIоу краеведческэ электроннэ IофшIагъэу къыгъэхьазырыгъэм пае;
— Келермесскэ чIыпIэ тхылъеджэпIэ-къутамэу N 6-р (Джэджэ районымкIэ пащэр Марина Черкашинар);
— Тэхъутэмыкъое МБС-мкIэ Псэйтыку къоджэ тхылъеджапIэр (Iэшъхьэтетыр ДзэлI Светлан);
— Мыекъопэ районымкIэ гупчэ кIэлэцIыкIу тхылъеджапIэр (директорыр Надежда Уманец);
— къалэу Мыекъуапэ и ЦБС-кIэ модельнэ тхылъеджэпIэ-къутамэу N 1-р (пащэр Елена Овсянниковар);
— Кощхьэблэ районым и МЦБС-кIэ Блащэпсынэ модельнэ тхылъеджэпIэ-къутамэу N 1-р (пащэр Мызэ Бэла);
— Красногвардейскэ районым и МЦБС-кIэ Еленовскэ чIыпIэ тхылъеджэпIэ-къутамэу N 6-р (библиотекарь шъхьаIэр Галина Милютинар);
— Гупчэ тхылъеджапIэу Адыгэкъалэ дэтыр (пащэр ХъокIо Сурэт).
Республикэ зэнэкъокъум ижюри итхьамэтагъэр АР-м и Лъэпкъ тхылъеджапIэ ипащэу, УФ-м культурэмкIэ изаслуженнэ IофышIэу Къыкъ Бэл ары. Ащ игущыIэ къызэрэщыхигъэщыгъэмкIэ, зэнэкъокъум имурад шъхьаIэхэм ащыщыгъ тиреспубликэ икультурнэ кIэн къэзыухъумэхэрэр зыфэгъэзэгъэ IофшIэн гъэнэфагъэхэм ягъэгугъугъэнхэр, цIыфхэр къызлъащэнхэр, ахэм язэгурыIоныгъэ-зэдэлэжьэныгъэкIэ мамырныгъэр агъэпытэным фэщэгъэнхэр ары.
Дзэукъожь Нуриет.
Сурэтыр: культурэмкIэ Министерствэр.