ШIэхэу къыщызэIуахыщт

Геническэ дэт еджапIэу N 1-м псауныгъэр зыщагъэпытэрэ физкультурнэ комплексэу щашIырэм епхыгъэ IофшIэнхэр ыкIэм фэкIуагъэх.

Мы мафэхэм ащ жьырыкIуапIэхэр фашIых ыкIи къыпэIулъ шъолъырыр зэтырагъэпсыхьажьы. Урысые политическэ партиеу «Единэ Россием» и Адыгэ шъолъыр къутамэ къызэрэщаIуагъэмкIэ, Геническэ гурыт еджапIэу N 1-м вентиляциер ыкIи Iугъор изыщыщт системэр чIагъэуцуагъ. Комплекс Iупэр плиткэкIэ агъэп­кIагъ, къэгъагъэхэр зыхагъэтIысхьащт чIыпIэхэр агъэхьазырыгъэх. Джырэ уахътэм залым спорт Iэмэ-псымэхэр, спортсменхэм ящыгъынхэр зыщызэблахъущт ыкIи тренерхэм яунэ мебелыр ачIагъэуцо. ЗэрэхъурэмкIэ, Геническэ щашIырэ комплексыр шIэхэу къызэIуахыщт.

Шъугу къэдгъэкIыжьын, хэгъэгум шъолъырыкIэу къыхэхьагъэмэ Адыгеир IэпыIэгъу афэхъу, анахьэу зыфэгъэзагъэр Херсонскэ хэкум ит Геническэ районыр ары. Едзыгъо-едзыгъоу ащ изэтегъэпсыхьанкIэ IофшIэнхэр щырагъэкIокIых, ахэм апэIухьанэу сомэ миллион 225-рэ республикэ бюджетым 2023-рэ илъэсым къыхагъэкIы.