Къуалъхьэ яшъумыт

Гъогу-патруль къулыкъум иIофышIэхэм ахъщэ къуалъхьэ язытын гухэлъ зиIэхэм пшъэдэкIыжь арагъэхьын зэралъэкIыщтымкIэ Къэра­лыгъо автоинспекцием водительхэм макъэ арегъэIу.
­ПшъэдэкIыжьым зыщиухъумэн гухэлъ иIэу водителым къуалъхьэ зитыкIэ уголовнэ Iоф къыфызэIуахын алъэкIыщт.

Къуалъхьэ яптыныр — бзэ­джэшIагъ, ащ къыделъытэ Iэ­на­тIэм Iутым хабзэм диштэу е хэбзэнчъэу Iофыгъохэр зэшIуи­хынхэр, е къуалъхьэ къезытырэм ифедэ хэлъэу ар чIиухъу­мэныр е икъулыкъукIэ дигъэ­кIоеныр.

Къуалъхьэ къызэрэIахырэр коррупциер нахьыбэу къызэ­лъызыубытырэ лъэныкъохэм ащыщ. Ащ къыделъытэ ахъщэ ыкIи уасэ зиIэ хьап-щыпхэр къаIыхыгъэныр е ифедэ хэлъэу хабзэр ыукъозэ IэнатIэ зиIэм къуалъхьэ етыгъэныр.

2023-рэ илъэсым иапэрэ мэзихэу пыкIыгъэм АР-м и Къэралыгъо автоинспекцие икъулыкъушIэхэм АР-м хэгъэгу кIоцI IофхэмкIэ и Министерствэ ипащэ дэуиплI фагъэхьыгъ коррупционнэ хэбзэукъоныгъэ къадэзэрахьэн гухэлъ зэряIа­гъэмкIэ. Федеральнэ законэу «Къолъхьэ тын-Iыхыным пэ­шIуе­кIогъэным фэгъэхьыгъ» зыфи­Iорэм къегъэнафэ къэралыгъо къулыкъушIэм коррупционнэ нэшанэ зиIэ хэбзэукъоныгъэ къыдызэрахьэн гухэлъ щыIагъэ­мэ пащэм макъэ рагъэIунэу.

УФ-м и Уголовнэ Кодекс къызэригъэнафэу, къуалъхьэ зы­­тыхэрэм бзэджэшIагъэу зэра­хьэхэрэр лъэныкъуищэу зэтеутыгъ: къуалъхьэ къаIызыхырэр — я 290-рэ статья, къуалъхьэ язытырэр — я 291-рэ статья, къолъхьэ тын-Iыхыным хэлэжьагъэхэр — я 291-1-рэ статья.

УФ-м и Уголовнэ Кодекс истатьяу 291-м къызэригъэ­нафэрэмкIэ, къуалъхьэ зытырэм илъэси 2-м нэс хьапс ыкIи къуалъхьэр зыфэдизым елъытыгъэу ащ фэдэ 15 — 30 фэдиз тазыр тыралъхьэ. IэнатIэ зиIэм къолъхьэшхо зыратыкIэ, ар зыфэдизым фэдэ 40-кIэ нахьыбэу тазырыр тыралъхьэ, ащ нэмыкIэу илъэси 3-м нэс хьапс мыщ пылъ.

КъэIогъэн фае, къуалъхьэ зытыгъэри зыштагъэри бзэ­джашIэхэу алъытэ.