Пэрытхэм язэIукI

Шъолъыр фестивалэу «Апэрэхэр» («Первые») зыфиIорэр чъэпыогъум и 29-м къыщегъэжьа­гъэу шэкIогъум и 4-м нэс Адыгеим щэкIо.

сурэтыр: А. Лаутеншлегер.

Мэфэ заулэм шъолъырым истудентхэр, икIэлэеджакIохэр, хэбзэ къулыкъухэм, «Движение первых» зыфиIорэм ишъолъыр къутамэ ялIыкIохэр ащ хэлэжьэщтых. ЗэкIэмкIи нэбгырэ 2900-рэ фэдиз ащ къекIолIэнэу агъэ­нафэ.

КIэлэцIыкIухэмрэ ныбжьыкIэхэмрэ я Урысые общественнэ-къэралыгъо движениеу «Движение первых» зыфиIорэм ишъо­лъыр отделение АР-м иминистрэхэм я Кабинет иIэпыIэгъоу Iофтхьабзэм кIэщакIо фэхъугъэх.

Ащ къырагъэблэгъагъэх АР-м гъэсэныгъэмрэ шIэныгъэмрэкIэ иминистрэ ипшъэрылъхэр зыгъэ­цэкIэрэ Евгений Лебедевыр, Джэджэ район администрацием ипащэу Андрей Таранухиныр, Красногвардейскэ район администрацием ипащэу Гъубжьэкъо Темур.

АР-м и ЛIышъхьэу КъумпIыл Мурат ыцIэкIэ къызэрэугъоигъэ­хэм шIуфэс къарихыгъ Евгений Лебедевым.

— НыбжьыкIэхэр ары пэрытхэу, лъэхъаным диштэу къэралыгъо Iофхэр лъэныкъо зэфэшъхьафхэмкIэ лъызыгъэкIотэщтхэр. «Движение первых» зыфиIорэ общественнэ къэралыгъо движениер республикэм зэрифэшъуашэу зэрэщызэхащэрэр ыкIи иIофшIэн зэрэхигъахъорэр мы фестивалым къеушыхьаты. УФ-м и Президентэу Владимир Путиным иунашъо тетэу, ныбжьыкIэ­хэм нахь ашIогъэшIэгъон лъэныкъохэм ар япхыгъ. Шъолъыр пэпчъ зэфэдэу хэлэжьэнхэ амал яIэн фаеу пшъэрылъ къагъэу­цугъ. Фестивалым шъуишIэныгъэхэм зэрахигъэхъощтым, ыпэкIэ шъу­зэрэлъигъэкIотэщтым щэч хэ­лъэп. Сыд фэдэрэ лъэныкъокIи IэпыIэгъу тыкъышъуфэхъуным тыфэхьазыр. Неущрэ мафэр шъоры зэлъытыгъэр, — къы­Iуагъ Евгений Лебедевым.

КIэлэцIыкIухэмрэ ныбжьыкIэхэмрэ я Урысые общественнэ-къэралыгъо движениеу «Движение первых» зыфиIорэм ишъолъыр отделение Iофэу ышIэрэм фэгъэхьыгъэу къыIо­тагъ ащ и Совет итхьаматэу Ованес Шекерьянц.

— НыбжьыкIэхэм лъэныкъо зэфэшъхьафхэмкIэ ягухэлъхэр къызыщыраIотыкIырэ, ахэр щыIэныгъэм зыщыпхыращырэ, яшIэныгъэхэм зыщыхагъэхъорэ чIыпIэу фестивалыр щыт. Мафэ къэс «Движение первых» зыфиIорэм кIэлэеджэкIо ыкIи студент 400 фэдиз хэлэжьэщт. Ахэр республикэм ирайонхэм ыкIи икъалэхэм къарыкIыщтых. Республикэм игъэцэкIэкIо ыкIи ихэбзэгъэуцу къулыкъухэм ялIыкIохэр гущыIэгъу къафэхъущтых, — къыIуагъ ащ.

КIэлэцIыкIухэмрэ ныбжьыкIэ­хэмрэ я Урысые общественнэ- къэралыгъо движениеу «Движение первых» зыфиIорэм хэтхэр нэIуасэ зэфэшIыгъэнхэр, яшIэныгъэхэм ахагъэхъоныр ары фестивалым пшъэрылъ шъхьаIэу иIэр. Ар зэIухыгъэ шъолъыр площадкэу щыт, неущрэ мафэр зыIэ илъ ныбжьыкIэхэм ясэнаущыгъэ къыщагъэлъэгъон алъэ­кIыщт.

Мэфи 7-м Адыгеим ичIыпIэ зэфэшъхьафхэм къарыкIырэ кIэлэ­еджакIохэр Iофтхьабзэм къекIолIэщтых. Мафэ къэс мэфэкI шIыкIэм тетэу фестивалыр къызэIуахыщт. Ащ къыдыхэлъыта­гъэу патриотическэ пIуныгъэм, эколо­гием ыкIи гъэсэныгъэм афэгъэ­хьыгъэ интеллектуальнэ площадкэхэр лъэныкъо 12-кIэ зэтеутыгъэхэу щыIэщтых, шъхьадж нахь зыпэблагъэр къыхихыщт, ащ нэмыкIэу студентхэм ыкIи кIэлэеджакIохэм мастер-классхэр, джэгукIэ зэфэшъхьафхэр ыкIи квизхэр афызэхащэщтых.

ДЕЛЭКЪО Анет.