«Адыгэмэ ядышъэид» зыфиIорэ проектыр ХьапэкIэ Риммэ къуаджэу Пщычэу щыпхырещы. Ащ къыдыхэлъытагъэу шIушIэ Iофтхьабзэхэри зэхищэнхэ, гъэшIэгъонэу, гум къинэжьхэу ахэр ригъэкIокIынхэ елъэкIы.
ХьапэкIэ Риммэ «ыIапэ дышъэр пэзы» зыфаIорэ цIыфхэм ащыщ. Ежь ынитIу алъэгъурэм нэмыкIэу ыгукIэ, иакъылкIэ зынэсырэр ыIитIукIэ ышIын елъэкIы. Ар махъэ, мадэ, дышъэ ыкIи тыжьын идыкIыным пылъ, унэ ыкIи щагу дизайнри къыдэхъу. БэшIагъэу шъошэ кIэракIэхэм ядын пылъ. Пкъыгъо гъэшIэгъонхэр къеугупшысых, ды-
шъэ ыкIи тыжьын тхыпхъэ хьалэмэтхэр хедыкIых. Бзылъфыгъэм иIофшIагъэхэр цIыфхэм лъэшэу агу рехьых.
«Лъэпкъ шIэжьым Iоф датшIэзэ, лIэужхэр искусствэм нахьышIоу зэрэхэтщэщтхэм тыпылъын фае, — къеIуатэ Риммэ. — Адыгэ пшъашъэм лъэпкъ шэн-хабзэхэр къыухъумэнхэ амал еттымэ, иIэпэIэсагъэ неущырэ мафэм щылъигъэкIотэщт. Нэбгырэ пэпчъ ищысэшIухэр щыIэныгъэм къыхэнэнхэм мэхьанэшхо иI. ЕгъэжьапIэм илъагъохэм зязгъэушъомбгъунэу, ишIыкIэшIухэм салъыхъунэу сыфежьагъ. ШIушIэ Iофтхьабзэхэр къуаджэм щызэхэсщэнхэу сыгу къэкIыгъ ыкIи ар сыублагъэ. Бзылъфыгъэ ныбжьыкIабэм мыр ашIогъэшIэгъонэу къычIэкIыгъ».
Тетых дунаим нэбгырэ зырызхэр Риммэ фэдэхэу, Тхьэм IэпэIасэу къыгъэхъугъэхэу. ИщыIэныгъэ гъогу зэрипхыгъэ кIэлэегъэджэ сэнэхьатым илъэсыбэрэ рылэжьагъ, джы илъэситIу хъугъэу еджапIэм къыIукIыжьыгъэу, унэм исэу шъуашэхэр едых. Зыуж ихьэгъэ лъэныкъом ишъэф пстэури къызIэкIигъэхьагъ. Ишэн-гъэпсыкIэкIэ, идунэееплъыкIэкIэ, зэхашIэу иIэмкIэ ыгукIэ зынэмысырэ щыIэп ыкIи ар нэрылъэгъоу ешIыжьы.
Дышъэидэным ишъэфхэр Риммэ къызщигъэлъэгъогъэ шIушIэ Iофтхьабзэм къекIолIэгъэ ныбжьыкIэхэм ащыщхэм яеплъыкIэ зыщыдгъэгъозагъ.
«Дышъэидэныр адыгэмэ къазыхэхьагъэр, лIэшIэгъуитIукIэ узэкIэIэбэжьымэ, Темыр-КъохьэпIэ Кавказым хэхъыкIыным зыщиушъомбгъунэу зыщырегъажьэр арэу тхылъ седжагъ. Дышъэидэным гъогоу къыкIугъэр зэзгъэшIэнэу Iофтхьабзэм сыкъекIолIагъ, — хегъэунэфыкIы пшъэшъэ ныбжьыкIэу Абрэдж Инсирэ. — Дышъэ ыкIи тыжьын IуданэхэмкIэ хэбдыкIыныр Iофышхоу къычIэкIыгъ. IэпэIасэм идесэхэр Iэрыфэгъух. Бзэн-дэныр бзылъфыгъэмэ ашIэн фае, щыIэныгъэм къащышъхьапэжьыщт. СапэкIэ езыгъэхъун гухэлъ сиI, Риммэ фэдэу IэпэIасэ сыхъу сшIоигъу».
«Дэн-бзэныр, дышъэидэныр, хъэныр, хэдыкIыныр — а зэпстэур адыгэ пшъашъэхэм, адыгэ бзылъфыгъэхэм яIэпэIэсэныгъэ щыщыгъ. СицIыкIугъом щегъэжьагъэу адыгэ шъуашэр сикIас», — къеIуатэ зэхахьэм къекIолIэгъэ Цэй Камилэ.
IэпэIасэм исаехэр кIэракIэх, ицыехэр зэкIужьых, игулъытэ, идунэезэхашIэ лъагэу зызэраIэтырэм ишыхьатых иIэшIэгъэ хьалэмэтхэу цIыфхэр зыщыгушIукIыхэрэр.
«ИжъыкIэ къыщегъэжьагъэу адрэ лъэпкъхэм ахэзымыгъэкIокIэрэ шъуашэу адыгэм иIэр саемрэ цыемрэ, — лъегъэкIуатэ игущыIэ Риммэ. — Ахэм ядэхагъэ нэр пIэпехы.
НыбжьыкIэу къэзэрэщэхэрэм адыгэ шъуашэр зэрэзыщалъэрэм сегъэгушIо. СиIэпэщысэхэр цIыфмэ зэрагъэфедэрэр лъэшэу сигуап. Лъэпкъ шъуашэр адыгэм ынап».
Ижъырэ сэнэхьатэу лIэшIэгъу пчъагъэ къэзыкIугъэр ащыгъупшэным нэсыгъагъ. Ау Адыгеим ис IэпэIасэхэм яшIуагъэкIэ ижъырэ искусствэу дышъэидэныр непэ зыпкъ рагъэуцожьы.