ЦIыф лъэпкъ пэпчъ бзэ гъэнэфагъэ иI. Хэти ыбзэ шIу елъэгъу. Хьатыгъужъыкъое гурыт еджапIэу Хьаткъо Ахьмэд ыцIэ зыхьырэм икIэлэегъаджэу УпчIэжьэгъу Мае илъэс 40 хъугъэу ныдэлъфыбзэм рэлажьэ, ащ изэгъэшIэн фэгъэхьыгъэ Iофтхьабзэхэр зэхещэх.
Адыгэ лъэпкъым икультурэ фэгъэхьыгъэ Iофтхьабзэу Адыгеим щырагъэкIокIыхэрэм лъапсэу яIэр бзэр, культурэр, лъэпкъ шIэжьыр къэухъумэгъэнхэр ары.
«Хэтрэ цIыф лъэпкъкIи анахь мэхьанэ зиIэр инамыс, ыбз, ишэн-хабзэхэр чIимынэнхэр, ахэр иIэубытыпIэу ипшъэрылъхэр щыIэныгъэм щыпхырищынхэр ары», хигъэунэфыкIыгъ УпчIэжьэгъу Мае.
Лъэпкъым идышъэ кIэн къызщежьэрэр ным икушъэ орэд, игъэсэпэтхыд, унагъом илъ шэн-хэбзэ зэхэтыкIэхэр арых.
«Сызылэжьэрэ илъэс 40-м къыкIоцI ныдэлъфыбзэм хэхъоныгъэ ышIыным сыпылъ. КIэлэцIыкIухэм гъэсэныгъэ-пIуныгъэ тэрэз ягъэгъотыгъэнымкIэ анахь мэхьанэ зиIэмэ ащыщ еджапIэр, — еIо кIэлэегъаджэм. — Ныдэлъфыбзэм, адыгэ культурэм ядэхагъэ икъу фэдизэу кIэлэеджакIомэ язгъашIэ сшIоигъу.
Адыгэ культурэм и Мафэ фэгъэхьыгъэ десэу «Сыбзэ — сыпсэ, сидунай» зыфиIорэр зэхэсщагъ, кIэлэцIыкIухэм ашIогъэшIэгъонэу ащ къыхэлэжьагъэх. Ащ дакIоу зэнэкъокъухэр, урок-хьакIэщхэр, зэIукIэхэр, зэдэджэгу сыхьатхэр зэхэсэщэх. «Адыгэхэм ятарихъ фэгъэхьыгъэу лъэпкъ тхыдэхэм къаIуатэрэр», «Адыгэхэм яныдэлъфыбзэрэ ятхыбзэрэ», «Адыгэхэм ящыIэкIэ-псэукIэрэ якультурэрэ», «Синыдэлъфыбзэ — сибаиныгъ» зыфиIорэ хэушъхьафыкIыгъэ темэхэм садэлажьэ».
Адыгэ культурэм и Мафэ фэгъэхьыгъэ сыхьатыр гъэшIэгъонэу рекIокIыгъ. Саемрэ цыемрэ зыщыгъ кIэлIэцIыкIухэр бзэм фэгъэхьыгъэ усэхэм къяджагъэх, адыгэ орэдхэр къаIуагъэх, къашъохэу «ЗэфакIор», «Ислъамыер» къашIыгъэх. Ныдэлъфыбзэр шIу зэралъэгъурэр, зэрагъэлъапIэрэр къаушыхьатыгъ.
Уахътэр. ЦIыфыр. ГъашIэр. Мы Iахьищыр сыди-гъуи зэготхэу зы гупшысэ мэстанэм екIых. Ащ елъытыгъэу къэпIон хъумэ, мы чIым къытехъорэ нэбгырэ пэпчъ ежь ыгу, ыпсэ, иакъыл-Iушыгъэ, игукIэгъу-къэбзагъэ атешIыкIыгъэ лъэуж къызэригъанэрэр хэти ешIэ. УпчIэжьэгъу Мае ищыIэныгъэ зыфигъэхьыгъэ еджапIэм илъэуж дахэ щыпхырищыгъ.
Лъэпшъыкъо Фатим.