Урысыем инароднэ артистэу, композитор цIэрыIоу Нэхэе Аслъан ыныбжь мыгъэ илъэс 80 хъущт. ГъэшIо зэхахьэхэр мыбжыхьэ къызэкIэлъыкIоу Адыгэ Республикэм ирайон зэфэшъхьафхэм ащэкIох.
Адыгэ Республикэм и Къэралыгъо лъэпкъ орэдыIо-къэшъокIо ансамблэу «Ислъамыем» ихэшыпыкIыгъэ программэ а мэфэкI концертхэм къащегъэлъагъо. Лъэпкъым имузыкальнэ культурэ лъэгэпIэ инхэм анэзыгъэсыгъэ мэкъэмэусым лъытэныгъэу фашIырэр къагъэлъагъоу цIыфхэр бэу зэхахьэхэм къякIуалIэх, гущыIэ фабэхэр Нэхэе Аслъан къыфаIох. Адыгеим имызакоу зэкIэ Кавказым щыцIэрыIо хъугъэ композиторыр гъунэгъу шъолъырхэми агъашIо, имэфэкI концертхэр зэхащэх. Джащ фэдэу, чъэпыогъум и 26-м, къалэу Краснодар Нэхэе Аслъан фэгъэхьыгъэ концерт ансамблэу «Ислъамыем» къыщитыгъ. Купым иIэшъхьэтет имэкъэмэ, иорэд анахь лъэшхэр, цIыфхэм нахь якIасэхэу «Ныдэлъф мэкъамэхэр», «Хьагъэуджым ирапсодие», «Нартмэ ясимфоние», «Адыгэ пщынэр», «Къолэн» ыкIи нэмыкIхэр ащ къыщаIуагъэх. Апэрэу Краснодар щыIугъ Нэхэе Аслъан IофшIэгъэ инэу мыгъэ ыусыгъэ лъэпкъ симфониер. Iахьищэу ар зэтеутыгъ, музыкальнэ жанрэ зэфэшъхьафхэр — классическэ орэд къэIуакIэри, лъэпкъ мэкъамэри зэдыхэтхэу, ащ джаз, рок едзыгъохэр ахэщыхьагъэу гъэпсыгъэ. Краснодар щыкIогъэ концертым къекlолlагъэхэм ящэнэрэ lахьэу «Дунэякlэм имэкъамэхэр» зыфиlорэр ары зэхахыгъэр. Симфониер зэрэпсаоу шэкlогъум и 18-м, Нэхэе Аслъан къызыхъугъэ мафэм тефэу, Мыекъуапэ щыкlощт мэфэкl гъэшlо зэхэхьэ шъхьаlэм къыщатыщт.
Краснодар зэхахьэм хэлэжьагъэхэм композиторым иlофшlагъэ осэ ин къыфашlыгъ. Гуфабэу, lэгу теор щызэпымыоу концертыр зэрэпсаоу кlуагъэ. Нэхэе Аслъан илэжьыгъэхэм яхьатыркlэ адыгэ лъэпкъым узэрэщыщым гушхоныгъэ къыпхелъхьэ. Композиторым зэрэфэразэхэр, зэрэфэгушlохэрэр Пшызэ шъолъыр ихэбзэ къулыкъухэм ялlыкlохэм къыхагъэщыгъ. Къэлэ хэбзэгъэуцу Зэlукlэм и Тхьаматэ игуадзэу Татьяна Гелуненкэм шlуфэlо гущыlэхэр концертым къыщиlуагъэх, Краснодар Думэм ишlуфэс тхылърэ ишlухьафтынрэ Нэхэе Аслъан пае «Ислъамыем» иартистхэм къаритыжьыгъ. Къыфэгушlуагъ композиторым иныбджэгъушlоу Виктор Захарченкэр зипэщэ Пшызэ къэзэкъ орэдыlо купыри. Мы орэдыlохэм Нэхэе Аслъан иlофшlагъэхэр дэгъоу ашlэх, якlасэу къаlох. Джащ фэдэу Мэщбэшlэ Исхьакъ иусэ композиторым мэкъамэ фыхихыгъ ыкlи орэд дахэу ным икlалэ зэрежэщтыгъэм фэгъэхьыгъэу «Старинная песня» зыфиlорэр къэзэкъ купым къыlо хъугъэ. Краснодар щыкlогъэ концертым а орэдыр ягуапэу къыщаlуагъ.
Краснодар краим и Адыгэ Хасэ итхьаматэу Мэщылl Руслъан агъашlорэ композиторыр дунаим щыпсэурэ адыгэхэм зэкlэми анапэу зэрэщытыр, лъэпкъым икультурэ хэхъоныгъэу фишlыгъэм пае шъхьэкlэфэныгъэ инэу Нэхэе Аслъан фишlырэр игущыlэ къыщыхигъэщыгъ.
Адыгэ мэкъамэр, пщыналъэр Краснодар щыпсэухэрэм апэрэп зэрэзэхахырэр, тиартистхэм концертхэр бэрэ тигъунэгъу шъолъырым къыщатых. Ау мызыгъэгум зэlукlэм иушъхьагъугъэр Нэхэе Аслъан имэфэкlэу къэблагъэрэр ары, ащ елъытыгъэуи гушlуагъор, гуфэбэныгъэр, гушхоныгъэр нахь къебэкlхэу «Ислъамыем» иконцерт зэхащагъ.
ТIэшъу Светлан.
Адыгеим изаслуженнэ журналист.