Вероникэ скрипкэ къыфагъэшъошагъ

Владимир Спиваковым и Дунэе шIушIэ фонд ипроектэу «Гугъэм инэф» зыфиIорэм текIоныгъэ къыщыдихыгъ ис­кусствэхэмкIэ кIэлэцIыкIу еджапIэу N 1-м икIэлэеджакIоу Вероника Смирновам. Я XX-рэ Дунэе фестивалэу «Москва иныбджэгъумэ апэгъокIы» зыфиIорэм ащ Адыгеир къыщигъэлъэгъощт.

Творческэ гъэхъагъэу Вероникэ иIэхэм афэшI Владимир Спиваковым и Дунэе шIушIэ фонд скрипкэ къыфигъэшъошагъ. МэфэкI шIыкIэм тетэу скрипкэр чъэпыогъум и 25-м, искусствэхэмкIэ кIэлэцIыкIу еджапIэу N 1-м къыщыратыжьыгъ.

Фестивалыр зэхэзыщэрэр ыкIи резгъэкIокIырэр Владимир Спиваковыр ары, кIэлэцIыкIу творчествэм ылъэныкъокIэ анахь алъытэрэ фестивалэу мыр щыт. 2023-рэ илъэсым ар зыщыIэр илъэс 20 хъугъэ. А уахътэм къыкIоцI Урысыем ит къэлэ ыкIи поселкэ 395-рэ, хэгъэгу 50-мэ ащыщ кIэлэцIыкIухэр Дунэе фестивалым хэлэжьагъэх.