ТеатритIум язэдэлэжьэныгъ

АР-м и Лъэпкъ театрэу Цэй Ибрахьимэ ыцIэ зыхьырэмрэ Волгоград и Къэралыгъо музыкальнэ-драматическэ къэ­зэкъ театрэмрэ къэгъэ­лъэгъонхэмкIэ зэхъожьыгъэх.

Волгоград къикIыгъэ театрэм икъэгъэлъэ­гъонхэр бэмышIэу Мыекъуапэ щыкIуагъэх. «Пушкинскэ картэмкIэ» ахэм уяплъын плъэ­кIыщтыгъ.

Сталинград заом текIоныгъэр къызыдахыгъэр илъэс 80 зэрэхъугъэм фэгъэхьыгъэу творческэ Iофтхьабзэр зэхащэгъагъ.

Волгоград иартистхэм Адыгеим спектаклищ къыщагъэлъэгъуагъ: «Украденное солнце», «Коммуналка», «Последняя попытка» зыфиIохэрэр.

Спектаклэу «Украденное солнце» зыфиIорэмкIэ гастроль къэгъэлъэгъоныр къызэIуахыгъ.

Хэгъэгу зэошхом илъэхъан къалэу Сталинград ыщэчыгъэр, пэкIэкIыгъэр тарихъым инэкIубгъо анахь нэшхъэйхэм ащыщ. Спектаклэр хъугъэ-шIагъэм техыгъ, цIыфхэм ягу­къэкIыжьхэмкIэ ар зэхагъэуцуагъ. Спектаклэу «Украденное солнце» зыфиIорэм еплъыгъэхэм осэ ин фашIыгъ, театральнэ фестивальхэм ыкIи зэнэкъокъухэм ащ текIоныгъэр къащыдихыгъ.

Чъэпыогъум и 26 — 28-м АР-м и ­Лъэпкъ театрэу Цэй Ибрахьимэ ыцIэ зыхьырэм иак­терхэр Волгоград еблэгъэщтых. Спектак­лэхэу «Всадник счастья» и «Женихи» зыфиIохэрэр адыгабзэм илъэу къагъэлъэ­гъо­щтых. Ащ синхроннэу урысыбзэкIэ зэрадзэ­кIыжьыщт.

Спектаклэм ыуж Лъэпкъ театрэм конференцие щызэхащэгъагъ.

«АР-м и Лъэпкъ театрэ хэхъоныгъэхэр ышIынхэм тишъыпкъэу тыпылъ, — къыщи­Iуагъ ащ Адыгэ Республикэм иконцертнэ объединение ихудожественнэ пащэу Ацумыжъ Рустам. — Непэ тадэжь къеблэгъэгъэ хьакIэхэм тигуапэу тапэгъокIыгъ. Волго­град зыкъызэрэщыдгъэлъэгъощтым имыза­къоу, зишIуагъэ къэкIощт зэIукIэгъу гъэшIэгъонхэр тиIэщтых, зэзэгъыныгъэхэри зэдэтшIынхэу тэгъэнафэ. ТиIофшIэн лъэныкъуакIэ­хэр къыхэхьэх, ащ къыхэкIыкIэ, тызхэт уахъ­тэм тыдэбэкъоным, шэпхъакIэхэм тащыгъозэным тынаIэ тет».

Волгоград къикIыгъэ театрэм ипащэу Анд­рей Зуевым ыкIи спектаклэу «Украденное солнце» зыфиIорэр къэзыгъэлъэгъогъэ актерхэу Сергей Ячменевымрэ Мария Мирошинамрэ гущыIэгъу тафэхъугъ.

«Адыгеим фэбэныгъэ хэлъэу къызэрэ­щытпэгъокIыгъэхэр лъэшэу тигуапэ. Непэрэ къэ­гъэлъэгъоныр цIыфхэм агу рихьыгъэу, сценэм тет актермэ яжабзэ IупкIэу, зэхэугу­фыкIыгъэу анэсыгъэу сэлъытэ. ТапэкIи АР-м и Лъэпкъ театрэ зэпхыныгъэ дытиIэным,
Iоф зэдэтшIэным тыщэгугъы», — къыIуагъ А. Зуевым.

— Театрэм лъэныкъуабэ иI, — къыхигъэ­хъуагъ актрисэу Мария Мирошинам, — спектаклэр огъэхьазыры, ролыр зэогъашIэ, режиссерым Iоф дэошIэ, сценэм укъытехьэшъ, къэгъэлъэгъоныр къэоты. Залым кIым-сымэу чIэтымкIэ зэхэтшIагъ цIыфэу къэкIуа­гъэхэм къэгъэлъэгъоным мэхьанэу иIэр зэ­ралъыдгъэIэсын тлъэкIыгъэр, ащкIэ ахэм лъэшэу тафэраз.

Лъэпшъыкъо Фатим.

Сурэтхэр: А. Iэшъын.