ЕшIэгъухэм зафегъэхьазыры

БаскетболымкIэ Урысыем ичемпионат иапшъэрэ лигэ хэт Мыекъопэ «Динамо-МГТУ-м» чъэпыогъум и 21 — 22-м ешIэгъухэр иIэщтых. Республикэм икъэлэ шъхьаIэ еблэгъэщт Тобольскэ икомандэу «Нефтехимик».

Адыгеим икомандэ зэхъокIыныгъэхэр фэхъугъэх. ЕшIакIохэу Константин Куликовыр, Валентин Назаровыр, Юрий Рябовыр, Давид Сусловыр, Владимир Чичайкиныр, Никита Солдатовыр хэкIыжьы­гъэх. Артем Гапошиным спорт карьерэр ыухыгъ, джы ар командэм итренер шъхьаI. Рагъэблэгъагъэхэм ащыщых Глеб Бедняковыр, Алексей Медведевыр, Вадим Ериныр, Данила Донсковыр, Николай Муха. Лигэм команди 7 хэт: «Динамо МГТУ» (Мыекъуапэ), «Нефтехимик» (Тобольск), «Южный слон» (Ставрополь), «Металлург» (Магнитогорск), «Динамо» (Грозный), «Чебоксарские ястребы» (Чебоксары), «ЦСП-Химки» (Московскэ хэку).