«Джэныкъор» хэлэжьагъ

Творческэ купхэм яфестиваль-зэнэкъокъу текIоныгъэ къыщыдэзы­хы­гъэ­хэм я Гала-концертэу Москва щыкIуагъэм пэсэрэ адыгэ орэдхэр къэзыIорэ ан­самблэу «Джэныкъу» зыфиIоу Шэуджэн районым щызэ­хэщагъэр хэлэжьагъ.

УФ-м культурэмкIэ и Министерствэ фестивалым икIэщэкIуагъ. Урысыем народнэ творчествэмкIэ и Унэу В. Поленовым ыцIэ зыхьырэр зэхахьэм изэхэщакIу.
Пшъэрылъ шъхьаIэу фес­тивалым иIагъэр шэн­-ха­бзэхэм языкъегъэIэты­жьын, якъэухъумэн имэхьанэ цIыф­хэм алъыгъэIэ­сыгъэныр ары. Зэ­фэ­хьы­сыжь концертым творческэ куп 20 хэлэжьагъ. Ахэр лъэпкъ проектым игрант къизыхыгъэхэр ары.

Къэгъэлъэгъоным хэлэ­жьагъэх Адыгеим, Алтай, Бурятием, Да­гъы­стан, Якутием, Тывэ, Чувашием, Ка­релием, Удмуртием, Камчатскэ ыкIи Ставропольскэ крайхэм, нэмыкI­хэми къарыкIыгъэ творческэ купхэр.

Шъугу къэдгъэкIыжьын, пэ­сэрэ адыгэ орэдхэр къэзыIорэ купэу «Джэ­ныкъу» зыфиIорэм лъэпкъ проектым игрантэу сомэ миллионитIу 2023-рэ илъэ­сым ижъо­ны­гъуакIэ къырихыгъ.

«Джэныкъом» ипащэу Юсып Заур къызэриIуа­гъэм­кIэ, Галаконцертэу Москва щыкIуагъэм «Къэ­бэртаемэ ячэщ теу» зыфиIорэ лъэпкъ орэдыжъыр къыщаIуагъ. Адыгэ орэдыжъым имэкъамэ зэха­хьэм щагъэ­жъы­чыгъ. Фестивалым икIэщакIохэр фэбагъэ хэлъэу къапэ­гъо­кIы­гъэх. Пэсэрэ адыгэ орэд­хэр къэзыIорэ лъэпкъ купым хэтхэу Юсып Заур, Быщтэкъо Адам, Мерэм Аскэр, ПашIо Айдэмыр,Тутарыщ Заурбый­  адыгэ лъэпкъым ымакъэ, икультурэ, ишэн-хэбзэ дахэ­хэр искусствэм иамалхэмкIэ щыIэныгъэм къыщыухъу­мэгъэнхэм дэлажьэх.

Лъэпшъыкъо Фатим.