ЕшIэгъухэр гъэшIэгъоныщтых

Адыгэ Республикэм и ЛIышъхьэ ишIухьафтын зэрылъ зэнэкъокъум ия 12-рэ тур къыдыхэ­лъытэгъэ ешIэгъухэр командэхэм яIагъэх.

Къуаджэу Пэнэжьыкъуае щызэIукIагъэх «Чэчэнаимрэ» «Кощ­хьаблэмрэ». Бысымхэм ешIэкIэ дахэ къагъэлъэгъуагъ, зэIукIэгъур 5:1-у къахьыгъ. Зэрамыку Тимур Iэгуаор къэлапчъэм гъогогъуищэ дидзагъ (зэкIэмкIи дидзагъэр 12).

Адыгэ къэралыгъо университетыр «Мыекъуапэ» дешIагъ ыкIи 5:0-у текIоныгъэр къыдихыгъ. Зэнэкъокъум апэрэ чIыпIэр щызыIыгъыр «Кавказыр» ары, ау красногвардейскэхэм яешIэгъу­хэр къафэпсынкIэщтхэп. Пэрытныгъэ зыIыгъым ыуж къенэ Мыекъопэ районым икомандэу «Урожаир», ау ащ ешIэгъоу иIагъэр 3-кIэ нахь макI. А зэIукIэгъухэр къызихьы­хэкIэ ар апэрэ чIыпIэм кIощт. Джащ фэдэу «Чэчэнай» ыкIи «АГУ» зыфиIорэ командэхэри текIоныгъэм фэбэнэнхэ алъэ­кIыщт. Арышъ, къэнэгъэ зэIукIэгъухэр зэрэгъэшIэгъоныщтхэм щэч хэлъэп.

Командэхэр зыдэщыт чIыпIэ­хэр ыкIи очко пчъагъэу рагъэ­къугъэр:

1. «Кавказ» — 24.
2. «Чэчэнай» — 21.
3. «АГУ» — 19.
4. «Урожай» — 15.
5. «Кощхьабл» — 15.
6. «Тэхъутэмыкъуай» — 12.
7. «Адыгэкъал» — 10.
8. «Сириус» — 6.
9. «Мыекъуапэ» — 3.

Я 13-рэ турым къыдыхэлъытагъэу чъэпыогъум и 14-м «Кавказыр» «Чэчэнаим», чъэпыогъум и 15-м «Тэхъутэмыкъуаер» «Сириусым», «Мыекъуапэр» «Адыгэ­къалэ» аIукIэщтых. Чъэпыогъум и 25-м «Кощхьаблэр» «АГУ-м» дешIэщт. ЕшIэгъухэр зэкIэ мафэм сыхьатыр 3-м рагъэжьэщтых.