Урысые Iофтхьабзэу «ГъогурыкIоныр щынэгъончъэным и ЗыкI тхьамаф» зыфиIоу Iоныгъом и 18-м къыщегъэжьагъэу и 22-м нэс щыIагъэм къыдыхэлъытагъэу Адыгеим Iофтхьэбзэ зэфэшъхьафхэр щырекIокIыгъэх. Ахэм ащыщ АР-м и Къэралыгъо автоинспекцие кIэщакIо зыфэхъугъэ брифингэу къэбар жъугъэм иамалхэр зыхэлэжьагъэхэр.
Iофтхьабзэм къырагъэблэгъагъэх кIэлэцIыкIухэм гъэсэныгъэ тедзэ зыщызэрагъэгъотырэ Гупчэм ипащэу Наталья Щербинар, кIэлэцIыкIухэм яфитыныгъэхэр къэухъумэгъэнхэмкIэ Уполномоченнэу Наталья Агеевар, шъолъыр ресурснэ гупчэу «КIэлэцIыкIугъом инавигатор» зыфиIорэм илIыкIоу Инна Татаренкэр.
КIэлэцIыкIухэр зыхэфэгъэ гъогу хъугъэ-шIагъэхэу республикэм игъогухэм къатехъухьагъэхэмкIэ пэублэр къызэIуихыгъ Адыгеим и Къэралыгъо автоинспекцие зэхэщэн-аналитическэ IофшIэнымкIэ ыкIи пропагандэмкIэ иотдел ипащэу, полицием иподполковникэу Бзэджэжъыкъо Мурат. Ащ къызэриIуагъэмкIэ, гухэкI нахь мышIэми, IофшIэнышхоу зэрахьэрэм емылъытыгъэу, зэфэхьысыжьхэм къагъэлъэгъуагъэм уигъэрэзэнэу щытэп.
— 2023-рэ илъэсым имэзи 8 тштэмэ, кIэлэцIыкIухэр зыхэфэгъэ хъугъэ-шIэгъэ 33-рэ республикэм игъогухэм ащатхыгъ. Ахэм нэбгыри 5 ахэкIодагъ, ахэм ащыщэу зыныбжь илъэс 16-м нэмысыгъэхэр нэбгыри 4, илъэситIу мыхъугъэу зы нэбгырэ (Ставрополь краим къикIыгъагъ). Хъугъэ-шIэгъэ 33-м щыщэу 14-м шъобжхэр хэзыхыгъэ кIэлэцIыкIу 11-р автомобилым адисыгъэх, хэушъхьафыкIыгъэ тIысыпIэр е щынэгъончъэ бгырыпхыр агъэфедагъэп. Адрэ аварие 14-м ахэфагъэхэр лъэсрыкIо кIэлэцIыкIух, ежь ялажьэкIи, водительхэм бламыгъэкIыгъэхэуи агъэунэфыгъ. КIэлэцIыкIу фыкъоныгъэхэр нахь макIэ шIыгъэнхэм фэIорышIэрэ Iофтхьабзэу зетхьэрэр макIэп. Къулыкъу зэфэшъхьафхэм зэпхыныгъэ адытиIэу тэлажьэ, инспекцием икъулыкъушIэ пэпчъ гурыт еджапIэ епхыгъэу охътэ гъэнэфагъэм ащ макIо. Арэущтэу зэрэщытзи, пчъагъэхэм тагъэразэрэп, тапэкIэ IофшIэнэу зетхьэрэм джыри хэдгъэхъощт, — къыIуагъ Бзэджэжъыкъо Мурат.
Iофтхьабзэм зэрэщыхагъэунэфыкIыгъэмкIэ, кIэлэцIыкIухэр зыхэфэрэ гъогу хъугъэ-шIагъэхэр къэмыгъэхъугъэнхэм пае апэрапшIэу ны-тыхэм Iоф адэпшIэнэу щыт. Ащ дырегъаштэ Уполномоченнэу Наталья Агеевам.
— Ны-тыхэм лъэшэу тынаIэ атедгъэтын фае. Къэралыгъо автоинспекторхэм тырягъусэу еджапIэм ны-тыхэм ащыфызэхащэрэ зэIукIэгъухэм тахэлажьэ. Ясабыйхэм ящынэгъончъагъэкIэ пшъэдэкIыжьэу ахьырэр агу къэтэгъэкIыжьы. Джыри ащ фэдэ зэIукIэгъухэр нахьыбэ шIыгъэнхэ фае, — хигъэунэфыкIыгъ Наталья Агеевам.
ГъогурыкIоным ишапхъэхэр нахь дэгъоу кIэлэцIыкIухэм къагурыIоным фэшI джэгукIэ шъуашэм илъэу ябгъэшIэнхэр нахь тэрэзэу елъытэ Наталья Щербинам. КIэлэцIыкIухэм гъэсэныгъэ тедзэ зыщызэрагъэгъотырэ республикэ Гупчэм иIофшIэн а шIыкIэм тетэу зэхащэ, ащкIэ мобильнэ комплексэу «Щынэгъончъагъэм илабораторие» агъэфедэ. Анахь пэIудзыгъэ къоджэ псэупIэхэми мы автомобилыр адэхьэ, гъэшIэгъонэу егъэджэн сыхьатхэр ныбжьыкIэ цIыкIухэм афызэхащэх.
— Анахь цIыкIухэми щынэгъончъэу гъогум зэрэщызекIощтхэ шIыкIэхэр нахь дэгъоу къагурэIо джэгукIэ шъуашэм илъэу зябгъэлъэгъухэкIэ: гъогу тамыгъэхэр зэхашIыкIых, урамыр зэпачыным ыпэкIэ нэфрыгъуазэм зэреплъынхэ фаер е транспортым зэритIысхьагъэхэм тетэу IэубытыпIэхэр агъэфедэнхэр агу къэкIыжьы, — къыхегъэщы Наталья Щербинам.
Шъолъыр ресурснэ гупчэм илIыкIоу Инна Татаренкэм къызэриIуагъэмкIэ, тиеджапIэхэм IэнэтIакIэ ачIэлъ хъугъэ – пIуныгъэмкIэ ыкIи кIэлэцIыкIу общественнэ объединениехэм адэлэжьэгъэнымкIэ пащэм иупчIэжьэгъу. Мы IофышIэхэр ащ фэдэу гъэсэныгъэ лъэныкъом фэгъэзэгъэщтхэп, анахьэу кIэлэцIыкIухэм япIуныгъэ лъыплъэщтых. НыбжьыкIэ отрядхэм яинспекторхэм (ЮИД) адэлэжьэщтых, гъогурыкIоным ишапхъэхэр псынкIэу, Iэрыфэгъоу зэрарагъэшIэщтым ыуж итыщтых. Нэужым ежь зэлэгъухэм яшIэныгъэхэр зэIэпахынхэ алъэкIыщт.
Iофтхьабзэм икIэухым журналистхэм яупчIэхэм яджэуапхэр зэхэщакIохэм къатыжьыгъэх.
Iэшъынэ Сусан.