Урысые Iофтхьабзэу «ГъогурыкIоныр щынэгъончъэным и ЗыкI тхьамаф» зыфиIорэм къыдыхэлъытагъэу гъогурыкIоныр щынэгъончъэным иIофыгъохэм, анахьэу кIэлэцIыкIу гъогу-транспорт фыкъоныгъэхэм, общественностым ынаIэ атыридзэным фэшI АР-м и Къэралыгъо автоинспекциерэ шъолъыр гъэIорышIэнымкIэ и Гупчэрэ медиа-флешмоб зэхащагъ.
Мыхэм ягукъэкI гъэцэкIэкIо ыкIи хэбзэгъэуцу къулыкъухэм, муниципальнэ образованиехэм япащэхэм, культурэм, спортым ащызэлъашIэрэ цIыфхэм, журналистхэм дырагъэштагъ. ГъогурыкIоным хэлэжьэрэ пстэуми — водительхэм, лъэсрыкIохэм, кIэлэцIыкIухэм ыкIи ны-тэхэм зафагъазэзэ, гъогурыкIоным ишапхъэхэр шIокI имыIэу гъэцэкIэгъэным мэхьанэ зэриIэр къизыIотыкIырэ видеороликхэр тыратхагъэх. Нэужым ахэр социальнэ хъытыум щыряIэ нэкIубгъохэм хештегэу #НеделяБезопасности2023 зыфиIорэр пытхагъэу къырагъэхьагъэх.
Джэпсалъэу къашIыгъэхэр анахьэу зыфэгъэхьыгъэхэр псынкIэ зекIоныр щагъэзыеныр, гъогу зэпырыкIыпIэхэм ыкIи зэхэкIыпIэхэм узэращызекIощт шапхъэхэр агъэцэкIэнхэр, щынэгъончъэ бгырыпхыр, нэфынэр къэзытырэ пкъыгъохэр агъэфедэнхэр.
Къэралыгъо къулыкъу зэфэшъхьафхэм ыкIи гъэсэныгъэм иорганизациехэм, къэбар жъугъэм иамалхэм ясайтхэм роликхэр къарыхьагъэх.
Ащ фэдиз цIыфыр къызфэджэгъэ шапхъэхэр республикэм щыпсэухэрэми, хьакIэу къэкIуагъэхэми шIокI имыIэу агъэцэкIэнхэм Адыгеим и Къэралыгъо автоинспекцие ыкIи флешмобым хэлажьэхэрэр щэгугъых.
Iэшъынэ Сусан.