Лъэпкъ проектэу «Гъэсэныгъэм» ифедеральнэ проектэу «Цифровая образовательная среда» зыфиIорэм къыдыхэлъытагъэу гъэсэныгъэ зыщарагъэгъотырэ Гупчэ поселкэу Инэм дэт гурыт еджапIэу Советскэ Союзым и ЛIыхъужъэу А. Н. Березовоим ыцIэ зыхьырэм мы мафэхэм къыщызэIуахыгъ.
Цифрэм ылъэныкъокIэ кIэлэеджакIохэм шIэныгъэ ягъэгъотыгъэныр, аужырэ шапхъэхэм адиштэрэ технологиякIэхэм нэIуасэ афэшIыгъэнхэр ары Гупчэм пшъэрылъэу иIэр. Мы илъэс еджэгъум Гупчэм шIэныгъэ зыщарагъэгъотынэу кIэлэеджэкIо 200 фэдизмэ зарагъэтхыгъ.
—КIэлэеджакIохэр программированием имызакъоу ежь-ежьырэу проектхэр ашIынхэм ыкIи ахэр зэрифэшъуашэу агъэфедэнхэм фагъасэх. Джырэ ныбжьыкIэхэм программированием мэхьанэшхо раты. ЫпэкIэ инджылызыбзэр зэрэзэрагъэшIэщтым нахь пылъыгъэхэмэ, джы техникэм хэшIыкI фыряIэным ыуж итых. Ащ дакIоу ящыIэныгъэ гъогу зэрапхыщт сэнэхьатым икъыхэхынкIэ IэпыIэгъу тафэхъу, — къыIуагъ Гупчэм ипащэу Барцо Рустам.
Федеральнэ субсидиехэм ыкIи республикэ бюджетым къытIупщыгъэ ахъщэмкIэ Гупчэр зэтырагъэпсыхьагъ, шэпхъэшIухэм адиштэрэ Iэмэ-псымэхэр чIэтых.
Шъугу къэдгъэкIыжьын, 2021-рэ илъэсым Iоныгъом и 1-м мэфэкI шIыкIэм тетэу республикэм апэрэ IТ-клуб къыщызэIуахыгъагъ. Ащ щеджэрэ ныбжьыкIэхэм гъэхъэгъэшIухэр ашIых, яшIэныгъэхэм ахагъахъо.
Мы пшъэрылъхэр зэшIохыгъэнхэм Гупчэм ынаIэ тыригъэтыщт.