Лъэпкъ проектэу «Гъэсэныгъ» зыфиIорэм къыдыхэлъытагъэу теннис зыщешIэхэрэ столхэр, волейбол зэрешIэхэрэ Iэгуаохэр ыкIи еджапIэхэм ящыкIэгъэщт нэмыкI спорт Iэмэ-псымэхэр къэщэфыгъэнхэм епхыгъэ аукцион мы мафэхэм АР-м гъэсэныгъэмрэ шIэныгъэмрэкIэ и Министерствэ зэхищагъ.
Зэзэгъыныгъэм пэублэ осэ анахь инэу итыр сомэ мин 549-рэ.
Урысыем ишъолъыр зэфэшъхьафхэм ащыщэу ахэр къезыгъэолIэнхэ зылъэкIыщти 9 аукционым хэлэжьагъ. Чэчэн Республикэм щыщ предпринимателэу пэублэ уасэм процент 35-рэ къыщызгъэкIагъэм текIоныгъэр къыдихыгъ.
Монополием пэшIуекIорэ Федеральнэ къулыкъум ишъолъыр ГъэIорышIапIэ аукционыр хэбзэгъэуцугъэм тетэу кIуагъэмэ ыуплъэкIугъ. Зэрифэшъуашэу ар зэрэзэхащагъэр къыушыхьатыгъ.
Мыекъуапэ, Теуцожь, Джэджэ, Тэхъутэмыкъое районхэм арыт гурыт еджапIэхэм спорт Iэмэ-псымэхэр афащагъэх.
Шъугу къэдгъэкIыжьын 2018-рэ илъэсым Урысые Федерацием и Президент кIэщакIо зыфэхъугъэ лъэпкъ проект 12 зэраштэгъагъэр, ахэр 2024-рэ илъэсым ыкIэ нэс агъэцэкIэщтых. Джащ фэдэу хэбзэгъэуцугъэм диштэу Iэмэ-псымэхэр ащэфыхэмэ монополием пэшIуекIорэ Федеральнэ къулыкъум ыкIи ащ ишъолъыр къулыкъухэм ауплъэкIух.