Мыекъуапэ щыщ хъулъфыгъэ горэм 2022-рэ илъэсым иIоныгъо Интернетыр къызфигъэфедэзэ, Украинэм и УIэшыгъэ КIуачIэхэм яподразделениеу «Легионэу «Свобода России» зыфиIорэм ителефон номерхэр къызIэкIигъэхьагъэх. Ар зыфэягъэр пыим узэрэгохьащт, Украинэм и УIэшыгъэ КIуачIэхэм уахэтэу узэрэзэощт шIыкIэр зэригъэшIэнэу ары. Урысые Федерацием и Апшъэрэ хьыкум 2023-рэ илъэсым гъэтхапэм и 16-м ышIыгъэ унашъом «Легионэу «Свобода России» зыфиIорэр террористическэу ыкIи Урысыем щызэхащэн фимытхэу щыгъэнэфагъ.
Хъулъфыгъэр апэ зафатхэм, зыми джэуап къытыжьыгъэп. 2023-рэ илъэсым имэзае ятIонэрэу зафатхэм, ышъхьэ фэгъэхьыгъэ къэбархэр «Легионым» IэкIигъэхьанхэу игъо къыфалъэгъугъ. Ау арэущтэу зэрэзекIуагъэр Урысыем ихэбзэухъумэкIо къулыкъухэм къашIэным тещыныхьи, Урысые Федерацием щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ ышъхьэкIэ зыфигъэзагъ.
Украинэм и УIэшыгъэ КIуачIэхэм яподразделениеу «Легионэу «Свобода России» зыфиIоу 2022-рэ илъэсым гъэтхапэм и 10-м зэхащагъэм гухэлъ шъхьаIэу иIэр Урысые Федерацием иконституционнэ гъэпсыкIэ ылъапсэхэм къакIегъэчыгъэныр ары. Урысыем идзэкъулыкъушIэхэмрэ Урысыем и УIэшыгъэ КIуачIэхэм хэушъхьафыкIыгъэ дзэ операциер Украинэм зэрэщызэхащэрэм дезымыгъаштэхэрэмрэ ары ащкIэ анахьэу къызфагъэфедэхэрэр. «Легионым» пшъэрылъэу иIэхэм ащыщ Урысыем иныбжьыкIэхэр гъэплъэхъугъэнхэр, ахэр терроризмэм хэщэгъэнхэр.
Урысыем и Уголовнэ кодекс ия 275-рэ статья къызэриIорэмкIэ, мы статьям, я 276-рэ, я 278-рэ статьяхэм зигугъу къашIырэ бзэджэшIагъэхэр зезыхьагъэхэм уголовнэ пшъэдэкIыжь арагъэхьырэп ежь-ежьырэу хэбзэ къулыкъухэм зызафагъазэкIэ е Урысые Федерацием ифедэхэр амыукъонхэм тегъэпсыхьэгъэ къэбархэр заIэкIагъахьэхэкIэ.
Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ 2023-рэ илъэсым бэдзэогъум и 17-м Мыекъуапэ щыщ хъулъфыгъэм. Урысыем и Уголовнэ кодекс ия 275-рэ статья зигугъу къышIырэ бзэджэшIагъэхэр зэримыхьанхэу пхъашэу фигъэпытагъ.
Урысыем щынэгъончъэнымкIэ и Федеральнэ къулыкъу
Адыгэ РеспубликэмкIэ и ГъэIорышIапIэ ипресс-къулыкъу